1īśāvāsyamidaṃ sarvaṃ yatkiñca jagatyāṃ jagat tena tyaktena bhuñjīthā mā gṛdhaḥ kasya sviddhanaṃ ||
2kurvanneveha karmāṇi jijīviṣecchataṃ samāḥ | evaṃ tvayi nānyatheto'sti na karma lipyate nare ||
3asūryā nāma te lokā andhena tamasāvṛtāḥ | tāṃste pretyābhigacchanti ye ke cātmahano janāḥ ||
4anejadekaṃ manaso javīyo nainaddevā āpnuvan pūrvamarṣat | taddhāvato'nyānatyeti tiṣṭhattasminnapo mātariśvā dadhāti ||
5tadejati tannaijati taddūre tadvantike | tadantarasya sarvasya tadu sarvasyāsya bāhyataḥ ||
6yastu sarvāṇi bhūtānyātmanyevānupaśyati | sarvabhūteṣu cātmānaṃ tato na vijugupsate ||
7yasmin sarvāṇi bhūtānyātmaivābhūdvijānataḥ | tatra ko mohaḥ kaḥ śoka ekatvamanupaśyataḥ ||
8sa paryagācchukramakāyamavraṇamasnāviraṃ śuddhamapāpaviddhaṃ | kavirmanīṣī paribhūḥ svayambhūryāthātathyato'rthān vyadadhācchāśvatībhyaḥ samābhyaḥ ||
9andhaṃ tamaḥ praviśanti ye'vidyāmupāsate | tato bhūya iva te tamo ya u vidyāyāṃ ratāḥ ||
10anyadevāhurvidyayānyadāhuravidyayā iti śuśruma dhīrāṇāṃ ye nastadvicacakṣire ||
11vidyāṃ cāvidyāṃ ca yastadvedobhayaṃ saha | avidyayā mṛtyuṃ tīrtvā vidyayāmṛtamaśnute ||
12andhaṃ tamaḥ praviśanti ye'sambhūtimupāsate | tato bhūya iva te tamo ya u sambhūtyāṃ ratāḥ ||
13anyadevāhuḥ sambhavādanyadāhurasambhavāt | iti śuśruma dhīrāṇāṃ ye nastadvicacakṣire ||
14sambhūtiṃ ca vināśaṃ ca yastadvedobhayaṃ saha | vināśena mṛtyuṃ tīrtvā sambhūtyāmṛtamaśnute ||
15hiraṇmayena pātreṇa satyasyāpihitaṃ mukhaṃ | tattvaṃ pūṣannapāvṛṇu satyadharmāya dṛṣṭaye ||
16pūṣannekarṣe yama sūrya prājāpatya vyūha raśmīn samūha | tejo yatte rūpaṃ kalyāṇatamaṃ tatte paśyāmi yo'sāvasau puruṣaḥ so'hamasmi ||
17vāyuranilamamṛtamathedaṃ bhasmāntaṃ śarīraṃ | oṃ krato smara kṛtaṃ smara krato smara kṛtaṃ smara ||
18agne naya supathā rāye asmān viśvāni deva vayunāni vidvān | yuyodhyasmajjuhurāṇameno bhūyiṣṭhāṃ te nama uktiṃ vidhema ||
Chapter source notes
Independent normalized IAST transcription from Röer 1850, printed pp. 4–27. See Edition source for the Devanagari print and commentary.
Verse 3 retains Roer’s asūryā. Word spacing, nasal notation and post-r doubling follow the declared normalization policy; no automatic equivalence with the retired edition is implied.