iti47:0.1Itivuttaka 47
iti47:0.2Dukanipāta
iti47:0.3Dutiyavagga
iti47:0.4Jāgariyasutta
iti47:1.1Vuttañhetaṁ bhagavatā vuttamarahatāti me sutaṁ:
iti47:2.1“Jāgaro cassa, bhikkhave, bhikkhu vihareyya sato sampajāno samāhito pamudito vippasanno ca tattha kālavipassī ca kusalesu dhammesu.
iti47:2.2Jāgarassa, bhikkhave, bhikkhuno viharato satassa sampajānassa samāhitassa pamuditassa vippasannassa tattha kālavipassino kusalesu dhammesu dvinnaṁ phalānaṁ aññataraṁ phalaṁ pāṭikaṅkhaṁ—
iti47:2.3diṭṭheva dhamme aññā, sati vā upādisese anāgāmitā”ti.
iti47:2.4Etamatthaṁ bhagavā avoca.
iti47:2.5Tatthetaṁ iti vuccati:
iti47:3.1“Jāgarantā suṇāthetaṁ,
iti47:3.2ye suttā te pabujjhatha;
iti47:3.3Suttā jāgaritaṁ seyyo,
iti47:3.4natthi jāgarato bhayaṁ.
iti47:4.1Yo jāgaro ca satimā sampajāno,
iti47:4.2Samāhito mudito vippasanno ca;
iti47:4.3Kālena so sammā dhammaṁ parivīmaṁsamāno,
iti47:4.4Ekodibhūto vihane tamaṁ so.
iti47:5.1Tasmā have jāgariyaṁ bhajetha,
iti47:5.2Ātāpī bhikkhu nipako jhānalābhī;
iti47:5.3Saṁyojanaṁ jātijarāya chetvā,
iti47:5.4Idheva sambodhimanuttaraṁ phuse”ti.
iti47:6.1Ayampi attho vutto bhagavatā, iti me sutanti.
iti47:6.2Dasamaṁ.