iti94:0.1Itivuttaka 94
iti94:0.2Tikanipāta
iti94:0.3Pañcamavagga
iti94:0.4Upaparikkhasutta
iti94:1.1Vuttañhetaṁ bhagavatā vuttamarahatāti me sutaṁ:
iti94:2.1“Tathā tathā, bhikkhave, bhikkhu upaparikkheyya yathā yathāssa upaparikkhato bahiddhā cassa viññāṇaṁ avikkhittaṁ avisaṭaṁ ajjhattaṁ asaṇṭhitaṁ anupādāya na paritasseyya.
iti94:2.2Bahiddhā, bhikkhave, viññāṇe avikkhitte avisaṭe sati ajjhattaṁ asaṇṭhite anupādāya aparitassato āyatiṁ jātijarāmaraṇadukkhasamudayasambhavo na hotī”ti.
iti94:2.3Etamatthaṁ bhagavā avoca.
iti94:2.4Tatthetaṁ iti vuccati:
iti94:3.1“Sattasaṅgappahīnassa,
iti94:3.2netticchinnassa bhikkhuno;
iti94:3.3Vikkhīṇo jātisaṁsāro,
iti94:3.4natthi tassa punabbhavo”ti.
iti94:4.1Ayampi attho vutto bhagavatā, iti me sutanti.
iti94:4.2Pañcamaṁ.