ud4.4:0.1Udāna 4.4
ud4.4:0.2Yakkhapahārasutta
ud4.4:1.1Evaṁ me sutaṁ—
ud4.4:1.2ekaṁ samayaṁ bhagavā rājagahe viharati veḷuvane kalandakanivāpe.
ud4.4:1.3Tena kho pana samayena āyasmā ca sāriputto āyasmā ca mahāmoggallāno kapotakandarāyaṁ viharanti.
ud4.4:1.4Tena kho pana samayena āyasmā sāriputto juṇhāya rattiyā navoropitehi kesehi abbhokāse nisinno hoti aññataraṁ samādhiṁ samāpajjitvā.
ud4.4:2.1Tena kho pana samayena dve yakkhā sahāyakā uttarāya disāya dakkhiṇaṁ disaṁ gacchanti kenacideva karaṇīyena.
ud4.4:2.2Addasaṁsu kho te yakkhā āyasmantaṁ sāriputtaṁ juṇhāya rattiyā navoropitehi kesehi abbhokāse nisinnaṁ.
ud4.4:2.3Disvāna eko yakkho dutiyaṁ yakkhaṁ etadavoca:
ud4.4:2.4“paṭibhāti maṁ, samma, imassa samaṇassa sīse pahāraṁ dātun”ti.
ud4.4:2.5Evaṁ vutte, so yakkho taṁ yakkhaṁ etadavoca:
ud4.4:2.6“alaṁ, samma, mā samaṇaṁ āsādesi.
ud4.4:2.7Uḷāro so, samma, samaṇo mahiddhiko mahānubhāvo”ti.
ud4.4:3.1Dutiyampi kho so yakkho taṁ yakkhaṁ etadavoca:
ud4.4:3.2“paṭibhāti maṁ, samma, imassa samaṇassa sīse pahāraṁ dātun”ti.
ud4.4:3.3Dutiyampi kho so yakkho taṁ yakkhaṁ etadavoca:
ud4.4:3.4“alaṁ, samma, mā samaṇaṁ āsādesi.
ud4.4:3.5Uḷāro so, samma, samaṇo mahiddhiko mahānubhāvo”ti.
ud4.4:3.6Tatiyampi kho so yakkho taṁ yakkhaṁ etadavoca:
ud4.4:3.7“paṭibhāti maṁ, samma, imassa samaṇassa sīse pahāraṁ dātun”ti.
ud4.4:3.8Tatiyampi kho so yakkho taṁ yakkhaṁ etadavoca:
ud4.4:3.9“alaṁ, samma, mā samaṇaṁ āsādesi.
ud4.4:3.10Uḷāro so, samma, samaṇo mahiddhiko mahānubhāvo”ti.
ud4.4:4.1Atha kho so yakkho taṁ yakkhaṁ anādiyitvā āyasmato sāriputtattherassa sīse pahāraṁ adāsi.
ud4.4:4.2Tāva mahā pahāro ahosi, api tena pahārena sattaratanaṁ vā aḍḍhaṭṭhamaratanaṁ vā nāgaṁ osādeyya, mahantaṁ vā pabbatakūṭaṁ padāleyya.
ud4.4:4.3Atha ca pana so yakkho “ḍayhāmi ḍayhāmī”ti vatvā tattheva mahānirayaṁ apatāsi.
ud4.4:5.1Addasā kho āyasmā mahāmoggallāno dibbena cakkhunā visuddhena atikkantamānusakena tena yakkhena āyasmato sāriputtattherassa sīse pahāraṁ dīyamānaṁ.
ud4.4:5.2Disvā yena āyasmā sāriputto tenupasaṅkami; upasaṅkamitvā āyasmantaṁ sāriputtaṁ etadavoca:
ud4.4:5.3“kacci te, āvuso, khamanīyaṁ, kacci yāpanīyaṁ, kacci na kiñci dukkhan”ti?
ud4.4:5.4“Khamanīyaṁ me, āvuso moggallāna, yāpanīyaṁ me, āvuso moggallāna;
ud4.4:5.5api ca me sīsaṁ thokaṁ dukkhan”ti.
ud4.4:6.1“Acchariyaṁ, āvuso sāriputta, abbhutaṁ, āvuso sāriputta.
ud4.4:6.2Yāva mahiddhiko āyasmā sāriputto mahānubhāvo.
ud4.4:6.3Idha te, āvuso sāriputta, aññataro yakkho sīse pahāraṁ adāsi.
ud4.4:6.4Tāva mahā pahāro ahosi, api tena pahārena sattaratanaṁ vā aḍḍhaṭṭhamaratanaṁ vā nāgaṁ osādeyya, mahantaṁ vā pabbatakūṭaṁ padāleyya, atha ca panāyasmā sāriputto evamāha:
ud4.4:6.5‘khamanīyaṁ me, āvuso moggallāna, yāpanīyaṁ me, āvuso moggallāna;
ud4.4:6.6api ca me sīsaṁ thokaṁ dukkhan’”ti.
ud4.4:7.1“Acchariyaṁ, āvuso moggallāna, abbhutaṁ, āvuso moggallāna.
ud4.4:7.2Yāva mahiddhiko āyasmā mahāmoggallāno mahānubhāvo yatra hi nāma yakkhampi passissati.
ud4.4:7.3Mayaṁ panetarahi paṁsupisācakampi na passāmā”ti.
ud4.4:8.1Assosi kho bhagavā dibbāya sotadhātuyā visuddhāya atikkantamānusikāya tesaṁ ubhinnaṁ mahānāgānaṁ imaṁ evarūpaṁ kathāsallāpaṁ.
ud4.4:9.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud4.4:10.1“Yassa selūpamaṁ cittaṁ,
ud4.4:10.2ṭhitaṁ nānupakampati;
ud4.4:10.3Virattaṁ rajanīyesu,
ud4.4:10.4kopaneyye na kuppati;
ud4.4:10.5Yassevaṁ bhāvitaṁ cittaṁ,
ud4.4:10.6kuto taṁ dukkhamessatī”ti.
ud4.4:10.7Catutthaṁ.