dn31:0.1Dīgha Nikāya 31
dn31:0.2Siṅgālasutta
dn31:1.1Evaṁ me sutaṁ—
dn31:1.2ekaṁ samayaṁ bhagavā rājagahe viharati veḷuvane kalandakanivāpe.
dn31:1.3Tena kho pana samayena siṅgālako gahapatiputto kālasseva uṭṭhāya rājagahā nikkhamitvā allavattho allakeso pañjaliko puthudisā namassati—
dn31:1.4puratthimaṁ disaṁ dakkhiṇaṁ disaṁ pacchimaṁ disaṁ uttaraṁ disaṁ heṭṭhimaṁ disaṁ uparimaṁ disaṁ.
dn31:2.1Atha kho bhagavā pubbaṇhasamayaṁ nivāsetvā pattacīvaramādāya rājagahaṁ piṇḍāya pāvisi.
dn31:2.2Addasā kho bhagavā siṅgālakaṁ gahapatiputtaṁ kālasseva vuṭṭhāya rājagahā nikkhamitvā allavatthaṁ allakesaṁ pañjalikaṁ puthudisā namassantaṁ—
dn31:2.3puratthimaṁ disaṁ dakkhiṇaṁ disaṁ pacchimaṁ disaṁ uttaraṁ disaṁ heṭṭhimaṁ disaṁ uparimaṁ disaṁ.
dn31:2.4Disvā siṅgālakaṁ gahapatiputtaṁ etadavoca:
dn31:2.5“kiṁ nu kho tvaṁ, gahapatiputta, kālasseva vuṭṭhāya rājagahā nikkhamitvā allavattho allakeso pañjaliko puthudisā namassasi—
dn31:2.6puratthimaṁ disaṁ dakkhiṇaṁ disaṁ pacchimaṁ disaṁ uttaraṁ disaṁ heṭṭhimaṁ disaṁ uparimaṁ disan”ti?
dn31:2.7“Pitā maṁ, bhante, kālaṁ karonto evaṁ avaca:
dn31:2.8‘disā, tāta, namasseyyāsī’ti.
dn31:2.9So kho ahaṁ, bhante, pituvacanaṁ sakkaronto garuṁ karonto mānento pūjento kālasseva uṭṭhāya rājagahā nikkhamitvā allavattho allakeso pañjaliko puthudisā namassāmi—
dn31:2.10puratthimaṁ disaṁ dakkhiṇaṁ disaṁ pacchimaṁ disaṁ uttaraṁ disaṁ heṭṭhimaṁ disaṁ uparimaṁ disan”ti.
dn31:2.11.01. Cha disā
dn31:2.12“Na kho, gahapatiputta, ariyassa vinaye evaṁ cha disā namassitabbā”ti.
dn31:2.13“Yathā kathaṁ pana, bhante, ariyassa vinaye cha disā namassitabbā?
dn31:2.14Sādhu me, bhante, bhagavā tathā dhammaṁ desetu, yathā ariyassa vinaye cha disā namassitabbā”ti.
dn31:2.15“Tena hi, gahapatiputta, suṇohi sādhukaṁ manasikarohi bhāsissāmī”ti.
dn31:2.16“Evaṁ, bhante”ti kho siṅgālako gahapatiputto bhagavato paccassosi.
dn31:2.17Bhagavā etadavoca:
dn31:3.1“Yato kho, gahapatiputta, ariyasāvakassa cattāro kammakilesā pahīnā honti, catūhi ca ṭhānehi pāpakammaṁ na karoti, cha ca bhogānaṁ apāyamukhāni na sevati, so evaṁ cuddasa pāpakāpagato chaddisāpaṭicchādī
dn31:3.2ubholokavijayāya paṭipanno hoti. Tassa ayañceva loko āraddho hoti paro ca loko.
dn31:3.3So kāyassa bhedā paraṁ maraṇā sugatiṁ saggaṁ lokaṁ upapajjati.
dn31:3.4.02. Cattāro kammakilesā
dn31:3.5Katamassa cattāro kammakilesā pahīnā honti?
dn31:3.6Pāṇātipāto kho, gahapatiputta, kammakileso, adinnādānaṁ kammakileso, kāmesumicchācāro kammakileso, musāvādo kammakileso.
dn31:3.7Imassa cattāro kammakilesā pahīnā hontī”ti.
dn31:3.8Idamavoca bhagavā.
dn31:3.9Idaṁ vatvāna sugato athāparaṁ etadavoca satthā:
dn31:4.1“Pāṇātipāto adinnādānaṁ,
dn31:4.2Musāvādo ca vuccati;
dn31:4.3Paradāragamanañceva,
dn31:4.4Nappasaṁsanti paṇḍitā”ti.
dn31:5.03. Catuṭhānaṁ
dn31:5.1“Katamehi catūhi ṭhānehi pāpakammaṁ na karoti?
dn31:5.2Chandāgatiṁ gacchanto pāpakammaṁ karoti, dosāgatiṁ gacchanto pāpakammaṁ karoti, mohāgatiṁ gacchanto pāpakammaṁ karoti, bhayāgatiṁ gacchanto pāpakammaṁ karoti.
dn31:5.3Yato kho, gahapatiputta, ariyasāvako neva chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati;
dn31:5.4imehi catūhi ṭhānehi pāpakammaṁ na karotī”ti.
dn31:5.5Idamavoca bhagavā.
dn31:5.6Idaṁ vatvāna sugato athāparaṁ etadavoca satthā:
dn31:6.1“Chandā dosā bhayā mohā,
dn31:6.2yo dhammaṁ ativattati;
dn31:6.3Nihīyati yaso tassa,
dn31:6.4kāḷapakkheva candimā.
dn31:6.5Chandā dosā bhayā mohā,
dn31:6.6yo dhammaṁ nātivattati;
dn31:6.7Āpūrati yaso tassa,
dn31:6.8sukkapakkheva candimā”ti.
dn31:7.04. Cha apāyamukhāni
dn31:7.1“Katamāni cha bhogānaṁ apāyamukhāni na sevati?
dn31:7.2Surāmerayamajjappamādaṭṭhānānuyogo kho, gahapatiputta, bhogānaṁ apāyamukhaṁ, vikālavisikhācariyānuyogo bhogānaṁ apāyamukhaṁ, samajjābhicaraṇaṁ bhogānaṁ apāyamukhaṁ, jūtappamādaṭṭhānānuyogo bhogānaṁ apāyamukhaṁ, pāpamittānuyogo bhogānaṁ apāyamukhaṁ, ālasyānuyogo bhogānaṁ apāyamukhaṁ.
dn31:8.05. Surāmerayassa cha ādīnavā
dn31:8.1Cha khome, gahapatiputta, ādīnavā surāmerayamajjappamādaṭṭhānānuyoge.
dn31:8.2Sandiṭṭhikā dhanajāni, kalahappavaḍḍhanī, rogānaṁ āyatanaṁ, akittisañjananī, kopīnanidaṁsanī, paññāya dubbalikaraṇītveva chaṭṭhaṁ padaṁ bhavati.
dn31:8.3Ime kho, gahapatiputta, cha ādīnavā surāmerayamajjappamādaṭṭhānānuyoge.
dn31:9.06. Vikālacariyāya cha ādīnavā
dn31:9.1Cha khome, gahapatiputta, ādīnavā vikālavisikhācariyānuyoge.
dn31:9.2Attāpissa agutto arakkhito hoti, puttadāropissa agutto arakkhito hoti, sāpateyyampissa aguttaṁ arakkhitaṁ hoti, saṅkiyo ca hoti pāpakesu ṭhānesu, abhūtavacanañca tasmiṁ rūhati, bahūnañca dukkhadhammānaṁ purakkhato hoti.
dn31:9.3Ime kho, gahapatiputta, cha ādīnavā vikālavisikhācariyānuyoge.
dn31:10.07. Samajjābhicaraṇassa cha ādīnavā
dn31:10.1Cha khome, gahapatiputta, ādīnavā samajjābhicaraṇe.
dn31:10.2Kva naccaṁ, kva gītaṁ, kva vāditaṁ, kva akkhānaṁ, kva pāṇissaraṁ, kva kumbhathunanti.
dn31:10.3Ime kho, gahapatiputta, cha ādīnavā samajjābhicaraṇe.
dn31:11.08. Jūtappamādassa cha ādīnavā
dn31:11.1Cha khome, gahapatiputta, ādīnavā jūtappamādaṭṭhānānuyoge.
dn31:11.2Jayaṁ veraṁ pasavati, jino vittamanusocati, sandiṭṭhikā dhanajāni, sabhāgatassa vacanaṁ na rūhati, mittāmaccānaṁ paribhūto hoti, āvāhavivāhakānaṁ apatthito hoti:
dn31:11.3‘akkhadhutto ayaṁ purisapuggalo nālaṁ dārabharaṇāyā’ti.
dn31:11.4Ime kho, gahapatiputta, cha ādīnavā jūtappamādaṭṭhānānuyoge.
dn31:12.09. Pāpamittatāya cha ādīnavā
dn31:12.1Cha khome, gahapatiputta, ādīnavā pāpamittānuyoge.
dn31:12.2Ye dhuttā, ye soṇḍā, ye pipāsā, ye nekatikā, ye vañcanikā, ye sāhasikā. Tyāssa mittā honti te sahāyā.
dn31:12.3Ime kho, gahapatiputta, cha ādīnavā pāpamittānuyoge.
dn31:13.010. Ālasyassa cha ādīnavā
dn31:13.1Cha khome, gahapatiputta, ādīnavā ālasyānuyoge.
dn31:13.2Atisītanti kammaṁ na karoti, atiuṇhanti kammaṁ na karoti, atisāyanti kammaṁ na karoti, atipātoti kammaṁ na karoti, atichātosmīti kammaṁ na karoti, atidhātosmīti kammaṁ na karoti.
dn31:13.3Tassa evaṁ kiccāpadesabahulassa viharato anuppannā ceva bhogā nuppajjanti, uppannā ca bhogā parikkhayaṁ gacchanti.
dn31:13.4Ime kho, gahapatiputta, cha ādīnavā ālasyānuyoge”ti.
dn31:13.5Idamavoca bhagavā.
dn31:13.6Idaṁ vatvāna sugato athāparaṁ etadavoca satthā:
dn31:14.1“Hoti pānasakhā nāma,
dn31:14.2hoti sammiyasammiyo;
dn31:14.3Yo ca atthesu jātesu,
dn31:14.4sahāyo hoti so sakhā.
dn31:14.5Ussūraseyyā paradārasevanā,
dn31:14.6Verappasavo ca anatthatā ca;
dn31:14.7Pāpā ca mittā sukadariyatā ca,
dn31:14.8Ete cha ṭhānā purisaṁ dhaṁsayanti.
dn31:14.9Pāpamitto pāpasakho,
dn31:14.10pāpaācāragocaro;
dn31:14.11Asmā lokā paramhā ca,
dn31:14.12ubhayā dhaṁsate naro.
dn31:14.13Akkhitthiyo vāruṇī naccagītaṁ,
dn31:14.14Divā soppaṁ pāricariyā akāle;
dn31:14.15Pāpā ca mittā sukadariyatā ca,
dn31:14.16Ete cha ṭhānā purisaṁ dhaṁsayanti.
dn31:14.17Akkhehi dibbanti suraṁ pivanti,
dn31:14.18Yantitthiyo pāṇasamā paresaṁ;
dn31:14.19Nihīnasevī na ca vuddhasevī,
dn31:14.20Nihīyate kāḷapakkheva cando.
dn31:14.21Yo vāruṇī addhano akiñcano,
dn31:14.22Pipāso pivaṁ papāgato;
dn31:14.23Udakamiva iṇaṁ vigāhati,
dn31:14.24Akulaṁ kāhiti khippamattano.
dn31:14.25Na divā soppasīlena,
dn31:14.26rattimuṭṭhānadessinā;
dn31:14.27Niccaṁ mattena soṇḍena,
dn31:14.28sakkā āvasituṁ gharaṁ.
dn31:14.29Atisītaṁ atiuṇhaṁ,
dn31:14.30atisāyamidaṁ ahu;
dn31:14.31Iti vissaṭṭhakammante,
dn31:14.32atthā accenti māṇave.
dn31:14.33Yodha sītañca uṇhañca,
dn31:14.34tiṇā bhiyyo na maññati;
dn31:14.35Karaṁ purisakiccāni,
dn31:14.36so sukhaṁ na vihāyatī”ti.
dn31:15.011. Mittapatirūpaka
dn31:15.1“Cattārome, gahapatiputta, amittā mittapatirūpakā veditabbā.
dn31:15.2Aññadatthuharo amitto mittapatirūpako veditabbo, vacīparamo amitto mittapatirūpako veditabbo, anuppiyabhāṇī amitto mittapatirūpako veditabbo, apāyasahāyo amitto mittapatirūpako veditabbo.
dn31:16.1Catūhi kho, gahapatiputta, ṭhānehi aññadatthuharo amitto mittapatirūpako veditabbo.
dn31:16.2Aññadatthuharo hoti,
dn31:16.3appena bahumicchati;
dn31:16.4Bhayassa kiccaṁ karoti,
dn31:16.5sevati atthakāraṇā.
dn31:16.6Imehi kho, gahapatiputta, catūhi ṭhānehi aññadatthuharo amitto mittapatirūpako veditabbo.
dn31:17.1Catūhi kho, gahapatiputta, ṭhānehi vacīparamo amitto mittapatirūpako veditabbo.
dn31:17.2Atītena paṭisantharati, anāgatena paṭisantharati, niratthakena saṅgaṇhāti, paccuppannesu kiccesu byasanaṁ dasseti.
dn31:17.3Imehi kho, gahapatiputta, catūhi ṭhānehi vacīparamo amitto mittapatirūpako veditabbo.
dn31:18.1Catūhi kho, gahapatiputta, ṭhānehi anuppiyabhāṇī amitto mittapatirūpako veditabbo.
dn31:18.2Pāpakampissa anujānāti, kalyāṇampissa anujānāti, sammukhāssa vaṇṇaṁ bhāsati, parammukhāssa avaṇṇaṁ bhāsati.
dn31:18.3Imehi kho, gahapatiputta, catūhi ṭhānehi anuppiyabhāṇī amitto mittapatirūpako veditabbo.
dn31:19.1Catūhi kho, gahapatiputta, ṭhānehi apāyasahāyo amitto mittapatirūpako veditabbo.
dn31:19.2Surāmerayamajjappamādaṭṭhānānuyoge sahāyo hoti, vikālavisikhācariyānuyoge sahāyo hoti, samajjābhicaraṇe sahāyo hoti, jūtappamādaṭṭhānānuyoge sahāyo hoti.
dn31:19.3Imehi kho, gahapatiputta, catūhi ṭhānehi apāyasahāyo amitto mittapatirūpako veditabbo”ti.
dn31:19.4Idamavoca bhagavā.
dn31:19.5Idaṁ vatvāna sugato athāparaṁ etadavoca satthā:
dn31:20.1“Aññadatthuharo mitto,
dn31:20.2yo ca mitto vacīparo;
dn31:20.3Anuppiyañca yo āha,
dn31:20.4apāyesu ca yo sakhā.
dn31:20.5Ete amitte cattāro,
dn31:20.6iti viññāya paṇḍito;
dn31:20.7Ārakā parivajjeyya,
dn31:20.8maggaṁ paṭibhayaṁ yathā”ti.
dn31:21.012. Suhadamitta
dn31:21.1“Cattārome, gahapatiputta, mittā suhadā veditabbā.
dn31:21.2Upakāro mitto suhado veditabbo, samānasukhadukkho mitto suhado veditabbo, atthakkhāyī mitto suhado veditabbo, anukampako mitto suhado veditabbo.
dn31:22.1Catūhi kho, gahapatiputta, ṭhānehi upakāro mitto suhado veditabbo.
dn31:22.2Pamattaṁ rakkhati, pamattassa sāpateyyaṁ rakkhati, bhītassa saraṇaṁ hoti, uppannesu kiccakaraṇīyesu taddiguṇaṁ bhogaṁ anuppadeti.
dn31:22.3Imehi kho, gahapatiputta, catūhi ṭhānehi upakāro mitto suhado veditabbo.
dn31:23.1Catūhi kho, gahapatiputta, ṭhānehi samānasukhadukkho mitto suhado veditabbo.
dn31:23.2Guyhamassa ācikkhati, guyhamassa parigūhati, āpadāsu na vijahati, jīvitaṁpissa atthāya pariccattaṁ hoti.
dn31:23.3Imehi kho, gahapatiputta, catūhi ṭhānehi samānasukhadukkho mitto suhado veditabbo.
dn31:24.1Catūhi kho, gahapatiputta, ṭhānehi atthakkhāyī mitto suhado veditabbo.
dn31:24.2Pāpā nivāreti, kalyāṇe niveseti, assutaṁ sāveti, saggassa maggaṁ ācikkhati.
dn31:24.3Imehi kho, gahapatiputta, catūhi ṭhānehi atthakkhāyī mitto suhado veditabbo.
dn31:25.1Catūhi kho, gahapatiputta, ṭhānehi anukampako mitto suhado veditabbo.
dn31:25.2Abhavenassa na nandati, bhavenassa nandati, avaṇṇaṁ bhaṇamānaṁ nivāreti, vaṇṇaṁ bhaṇamānaṁ pasaṁsati.
dn31:25.3Imehi kho, gahapatiputta, catūhi ṭhānehi anukampako mitto suhado veditabbo”ti.
dn31:25.4Idamavoca bhagavā.
dn31:25.5Idaṁ vatvāna sugato athāparaṁ etadavoca satthā:
dn31:26.1“Upakāro ca yo mitto,
dn31:26.2sukhe dukkhe ca yo sakhā;
dn31:26.3Atthakkhāyī ca yo mitto,
dn31:26.4yo ca mittānukampako.
dn31:26.5Etepi mitte cattāro,
dn31:26.6iti viññāya paṇḍito;
dn31:26.7Sakkaccaṁ payirupāseyya,
dn31:26.8mātā puttaṁva orasaṁ;
dn31:26.9Paṇḍito sīlasampanno,
dn31:26.10jalaṁ aggīva bhāsati.
dn31:26.11Bhoge saṁharamānassa,
dn31:26.12bhamarasseva irīyato;
dn31:26.13Bhogā sannicayaṁ yanti,
dn31:26.14vammikovupacīyati.
dn31:26.15Evaṁ bhoge samāhatvā,
dn31:26.16alamatto kule gihī;
dn31:26.17Catudhā vibhaje bhoge,
dn31:26.18sa ve mittāni ganthati.
dn31:26.19Ekena bhoge bhuñjeyya,
dn31:26.20dvīhi kammaṁ payojaye;
dn31:26.21Catutthañca nidhāpeyya,
dn31:26.22āpadāsu bhavissatī”ti.
dn31:27.013. Chaddisāpaṭicchādanakaṇḍa
dn31:27.1“Kathañca, gahapatiputta, ariyasāvako chaddisāpaṭicchādī hoti?
dn31:27.2Cha imā, gahapatiputta, disā veditabbā.
dn31:27.3Puratthimā disā mātāpitaro veditabbā, dakkhiṇā disā ācariyā veditabbā, pacchimā disā puttadārā veditabbā, uttarā disā mittāmaccā veditabbā, heṭṭhimā disā dāsakammakarā veditabbā, uparimā disā samaṇabrāhmaṇā veditabbā.
dn31:28.1Pañcahi kho, gahapatiputta, ṭhānehi puttena puratthimā disā mātāpitaro paccupaṭṭhātabbā—
dn31:28.2bhato ne bharissāmi, kiccaṁ nesaṁ karissāmi, kulavaṁsaṁ ṭhapessāmi, dāyajjaṁ paṭipajjāmi, atha vā pana petānaṁ kālaṅkatānaṁ dakkhiṇaṁ anuppadassāmīti.
dn31:28.3Imehi kho, gahapatiputta, pañcahi ṭhānehi puttena puratthimā disā mātāpitaro paccupaṭṭhitā pañcahi ṭhānehi puttaṁ anukampanti.
dn31:28.4Pāpā nivārenti, kalyāṇe nivesenti, sippaṁ sikkhāpenti, patirūpena dārena saṁyojenti, samaye dāyajjaṁ niyyādenti.
dn31:28.5Imehi kho, gahapatiputta, pañcahi ṭhānehi puttena puratthimā disā mātāpitaro paccupaṭṭhitā imehi pañcahi ṭhānehi puttaṁ anukampanti.
dn31:28.6Evamassa esā puratthimā disā paṭicchannā hoti khemā appaṭibhayā.
dn31:29.1Pañcahi kho, gahapatiputta, ṭhānehi antevāsinā dakkhiṇā disā ācariyā paccupaṭṭhātabbā—
dn31:29.2uṭṭhānena upaṭṭhānena sussusāya pāricariyāya sakkaccaṁ sippapaṭiggahaṇena.
dn31:29.3Imehi kho, gahapatiputta, pañcahi ṭhānehi antevāsinā dakkhiṇā disā ācariyā paccupaṭṭhitā pañcahi ṭhānehi antevāsiṁ anukampanti—
dn31:29.4suvinītaṁ vinenti, suggahitaṁ gāhāpenti, sabbasippassutaṁ samakkhāyino bhavanti, mittāmaccesu paṭiyādenti, disāsu parittāṇaṁ karonti.
dn31:29.5Imehi kho, gahapatiputta, pañcahi ṭhānehi antevāsinā dakkhiṇā disā ācariyā paccupaṭṭhitā imehi pañcahi ṭhānehi antevāsiṁ anukampanti.
dn31:29.6Evamassa esā dakkhiṇā disā paṭicchannā hoti khemā appaṭibhayā.
dn31:30.1Pañcahi kho, gahapatiputta, ṭhānehi sāmikena pacchimā disā bhariyā paccupaṭṭhātabbā—
dn31:30.2sammānanāya anavamānanāya anaticariyāya issariyavossaggena alaṅkārānuppadānena.
dn31:30.3Imehi kho, gahapatiputta, pañcahi ṭhānehi sāmikena pacchimā disā bhariyā paccupaṭṭhitā pañcahi ṭhānehi sāmikaṁ anukampati—
dn31:30.4susaṁvihitakammantā ca hoti, saṅgahitaparijanā ca, anaticārinī ca, sambhatañca anurakkhati, dakkhā ca hoti analasā sabbakiccesu.
dn31:30.5Imehi kho, gahapatiputta, pañcahi ṭhānehi sāmikena pacchimā disā bhariyā paccupaṭṭhitā imehi pañcahi ṭhānehi sāmikaṁ anukampati.
dn31:30.6Evamassa esā pacchimā disā paṭicchannā hoti khemā appaṭibhayā.
dn31:31.1Pañcahi kho, gahapatiputta, ṭhānehi kulaputtena uttarā disā mittāmaccā paccupaṭṭhātabbā—
dn31:31.2dānena peyyavajjena atthacariyāya samānattatāya avisaṁvādanatāya.
dn31:31.3Imehi kho, gahapatiputta, pañcahi ṭhānehi kulaputtena uttarā disā mittāmaccā paccupaṭṭhitā pañcahi ṭhānehi kulaputtaṁ anukampanti—
dn31:31.4pamattaṁ rakkhanti, pamattassa sāpateyyaṁ rakkhanti, bhītassa saraṇaṁ honti, āpadāsu na vijahanti, aparapajā cassa paṭipūjenti.
dn31:31.5Imehi kho, gahapatiputta, pañcahi ṭhānehi kulaputtena uttarā disā mittāmaccā paccupaṭṭhitā imehi pañcahi ṭhānehi kulaputtaṁ anukampanti.
dn31:31.6Evamassa esā uttarā disā paṭicchannā hoti khemā appaṭibhayā.
dn31:32.1Pañcahi kho, gahapatiputta, ṭhānehi ayyirakena heṭṭhimā disā dāsakammakarā paccupaṭṭhātabbā—
dn31:32.2yathābalaṁ kammantasaṁvidhānena bhattavetanānuppadānena gilānupaṭṭhānena acchariyānaṁ rasānaṁ saṁvibhāgena samaye vossaggena.
dn31:32.3Imehi kho, gahapatiputta, pañcahi ṭhānehi ayyirakena heṭṭhimā disā dāsakammakarā paccupaṭṭhitā pañcahi ṭhānehi ayyirakaṁ anukampanti—
dn31:32.4pubbuṭṭhāyino ca honti, pacchā nipātino ca, dinnādāyino ca, sukatakammakarā ca, kittivaṇṇaharā ca.
dn31:32.5Imehi kho, gahapatiputta, pañcahi ṭhānehi ayyirakena heṭṭhimā disā dāsakammakarā paccupaṭṭhitā imehi pañcahi ṭhānehi ayyirakaṁ anukampanti.
dn31:32.6Evamassa esā heṭṭhimā disā paṭicchannā hoti khemā appaṭibhayā.
dn31:33.1Pañcahi kho, gahapatiputta, ṭhānehi kulaputtena uparimā disā samaṇabrāhmaṇā paccupaṭṭhātabbā—
dn31:33.2mettena kāyakammena mettena vacīkammena mettena manokammena anāvaṭadvāratāya āmisānuppadānena.
dn31:33.3Imehi kho, gahapatiputta, pañcahi ṭhānehi kulaputtena uparimā disā samaṇabrāhmaṇā paccupaṭṭhitā chahi ṭhānehi kulaputtaṁ anukampanti—
dn31:33.4pāpā nivārenti, kalyāṇe nivesenti, kalyāṇena manasā anukampanti, assutaṁ sāventi, sutaṁ pariyodāpenti, saggassa maggaṁ ācikkhanti.
dn31:33.5Imehi kho, gahapatiputta, pañcahi ṭhānehi kulaputtena uparimā disā samaṇabrāhmaṇā paccupaṭṭhitā imehi chahi ṭhānehi kulaputtaṁ anukampanti.
dn31:33.6Evamassa esā uparimā disā paṭicchannā hoti khemā appaṭibhayā”ti.
dn31:33.7Idamavoca bhagavā.
dn31:33.8Idaṁ vatvāna sugato athāparaṁ etadavoca satthā:
dn31:34.1“Mātāpitā disā pubbā,
dn31:34.2ācariyā dakkhiṇā disā;
dn31:34.3Puttadārā disā pacchā,
dn31:34.4mittāmaccā ca uttarā.
dn31:34.5Dāsakammakarā heṭṭhā,
dn31:34.6uddhaṁ samaṇabrāhmaṇā;
dn31:34.7Etā disā namasseyya,
dn31:34.8alamatto kule gihī.
dn31:34.9Paṇḍito sīlasampanno,
dn31:34.10saṇho ca paṭibhānavā;
dn31:34.11Nivātavutti atthaddho,
dn31:34.12tādiso labhate yasaṁ.
dn31:34.13Uṭṭhānako analaso,
dn31:34.14āpadāsu na vedhati;
dn31:34.15Acchinnavutti medhāvī,
dn31:34.16tādiso labhate yasaṁ.
dn31:34.17Saṅgāhako mittakaro,
dn31:34.18vadaññū vītamaccharo;
dn31:34.19Netā vinetā anunetā,
dn31:34.20tādiso labhate yasaṁ.
dn31:34.21Dānañca peyyavajjañca,
dn31:34.22atthacariyā ca yā idha;
dn31:34.23Samānattatā ca dhammesu,
dn31:34.24tattha tattha yathārahaṁ;
dn31:34.25Ete kho saṅgahā loke,
dn31:34.26rathassāṇīva yāyato.
dn31:34.27Ete ca saṅgahā nāssu,
dn31:34.28na mātā puttakāraṇā;
dn31:34.29Labhetha mānaṁ pūjaṁ vā,
dn31:34.30pitā vā puttakāraṇā.
dn31:34.31Yasmā ca saṅgahā ete,
dn31:34.32sammapekkhanti paṇḍitā;
dn31:34.33Tasmā mahattaṁ papponti,
dn31:34.34pāsaṁsā ca bhavanti te”ti.
dn31:35.1Evaṁ vutte, siṅgālako gahapatiputto bhagavantaṁ etadavoca:
dn31:35.2“abhikkantaṁ, bhante, abhikkantaṁ, bhante.
dn31:35.3Seyyathāpi, bhante, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya ‘cakkhumanto rūpāni dakkhantī’ti; evamevaṁ bhagavatā anekapariyāyena dhammo pakāsito.
dn31:35.4Esāhaṁ, bhante, bhagavantaṁ saraṇaṁ gacchāmi dhammañca bhikkhusaṅghañca.
dn31:35.5Upāsakaṁ maṁ bhagavā dhāretu, ajjatagge pāṇupetaṁ saraṇaṁ gatan”ti.
dn31:35.6Siṅgālasuttaṁ niṭṭhitaṁ aṭṭhamaṁ.