sn22.59:0.1Saṁyutta Nikāya 22.59
sn22.59:0.26. Upayavagga
sn22.59:0.3Anattalakkhaṇasutta
sn22.59:1.1Ekaṁ samayaṁ bhagavā bārāṇasiyaṁ viharati isipatane migadāye.
sn22.59:1.2Tatra kho bhagavā pañcavaggiye bhikkhū āmantesi:
sn22.59:1.3“bhikkhavo”ti.
sn22.59:1.4“Bhadante”ti te bhikkhū bhagavato paccassosuṁ.
sn22.59:1.5Bhagavā etadavoca:
sn22.59:2.1“Rūpaṁ, bhikkhave, anattā.
sn22.59:2.2Rūpañca hidaṁ, bhikkhave, attā abhavissa, nayidaṁ rūpaṁ ābādhāya saṁvatteyya, labbhetha ca rūpe:
sn22.59:2.3‘evaṁ me rūpaṁ hotu, evaṁ me rūpaṁ mā ahosī’ti.
sn22.59:2.4Yasmā ca kho, bhikkhave, rūpaṁ anattā, tasmā rūpaṁ ābādhāya saṁvattati, na ca labbhati rūpe:
sn22.59:2.5‘evaṁ me rūpaṁ hotu, evaṁ me rūpaṁ mā ahosī’ti.
sn22.59:3.1Vedanā anattā.
sn22.59:3.2Vedanā ca hidaṁ, bhikkhave, attā abhavissa, nayidaṁ vedanā ābādhāya saṁvatteyya, labbhetha ca vedanāya:
sn22.59:3.3‘evaṁ me vedanā hotu, evaṁ me vedanā mā ahosī’ti.
sn22.59:3.4Yasmā ca kho, bhikkhave, vedanā anattā, tasmā vedanā ābādhāya saṁvattati, na ca labbhati vedanāya:
sn22.59:3.5‘evaṁ me vedanā hotu, evaṁ me vedanā mā ahosī’ti.
sn22.59:4.1Saññā anattā …pe…
sn22.59:4.2saṅkhārā anattā.
sn22.59:4.3Saṅkhārā ca hidaṁ, bhikkhave, attā abhavissaṁsu, nayidaṁ saṅkhārā ābādhāya saṁvatteyyuṁ, labbhetha ca saṅkhāresu:
sn22.59:4.4‘evaṁ me saṅkhārā hontu, evaṁ me saṅkhārā mā ahesun’ti.
sn22.59:4.5Yasmā ca kho, bhikkhave, saṅkhārā anattā, tasmā saṅkhārā ābādhāya saṁvattanti, na ca labbhati saṅkhāresu:
sn22.59:4.6‘evaṁ me saṅkhārā hontu, evaṁ me saṅkhārā mā ahesun’ti.
sn22.59:5.1Viññāṇaṁ anattā.
sn22.59:5.2Viññāṇañca hidaṁ, bhikkhave, attā abhavissa, nayidaṁ viññāṇaṁ ābādhāya saṁvatteyya, labbhetha ca viññāṇe:
sn22.59:5.3‘evaṁ me viññāṇaṁ hotu, evaṁ me viññāṇaṁ mā ahosī’ti.
sn22.59:5.4Yasmā ca kho, bhikkhave, viññāṇaṁ anattā, tasmā viññāṇaṁ ābādhāya saṁvattati, na ca labbhati viññāṇe:
sn22.59:5.5‘evaṁ me viññāṇaṁ hotu, evaṁ me viññāṇaṁ mā ahosī’ti.
sn22.59:6.1Taṁ kiṁ maññatha, bhikkhave,
sn22.59:6.2rūpaṁ niccaṁ vā aniccaṁ vā”ti?
sn22.59:6.3“Aniccaṁ, bhante”.
sn22.59:6.4“Yaṁ panāniccaṁ dukkhaṁ vā taṁ sukhaṁ vā”ti?
sn22.59:6.5“Dukkhaṁ, bhante”.
sn22.59:6.6“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn22.59:6.7‘etaṁ mama, esohamasmi, eso me attā’”ti?
sn22.59:6.8“No hetaṁ, bhante”.
sn22.59:6.9“Vedanā …
sn22.59:6.10saññā …
sn22.59:6.11saṅkhārā …
sn22.59:6.12viññāṇaṁ niccaṁ vā aniccaṁ vā”ti?
sn22.59:6.13“Aniccaṁ, bhante”.
sn22.59:6.14“Yaṁ panāniccaṁ dukkhaṁ vā taṁ sukhaṁ vā”ti?
sn22.59:6.15“Dukkhaṁ, bhante”.
sn22.59:6.16“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn22.59:6.17‘etaṁ mama, esohamasmi, eso me attā’”ti?
sn22.59:6.18“No hetaṁ, bhante”.
sn22.59:7.1“Tasmātiha, bhikkhave, yaṁ kiñci rūpaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ rūpaṁ: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya daṭṭhabbaṁ.
sn22.59:8.1Yā kāci vedanā atītānāgatapaccuppannā ajjhattā vā bahiddhā vā …pe… yā dūre santike vā, sabbā vedanā: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya daṭṭhabbaṁ.
sn22.59:9.1Yā kāci saññā …pe…
sn22.59:9.2ye keci saṅkhārā atītānāgatapaccuppannā ajjhattaṁ vā bahiddhā vā …pe… ye dūre santike vā, sabbe saṅkhārā: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya daṭṭhabbaṁ.
sn22.59:10.1Yaṁ kiñci viññāṇaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ viññāṇaṁ: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya daṭṭhabbaṁ.
sn22.59:11.1Evaṁ passaṁ, bhikkhave, sutavā ariyasāvako rūpasmimpi nibbindati, vedanāyapi nibbindati, saññāyapi nibbindati, saṅkhāresupi nibbindati, viññāṇasmimpi nibbindati.
sn22.59:11.2Nibbindaṁ virajjati; virāgā vimuccati. Vimuttasmiṁ vimuttamiti ñāṇaṁ hoti.
sn22.59:11.3‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānātī”ti.
sn22.59:12.1Idamavoca bhagavā.
sn22.59:12.2Attamanā pañcavaggiyā bhikkhū bhagavato bhāsitaṁ abhinanduṁ.
sn22.59:12.3Imasmiñca pana veyyākaraṇasmiṁ bhaññamāne pañcavaggiyānaṁ bhikkhūnaṁ anupādāya āsavehi cittāni vimucciṁsūti.
sn22.59:12.4Sattamaṁ.