sn56.11:0.1Saṁyutta Nikāya 56.11
sn56.11:0.22. Dhammacakkappavattanavagga
sn56.11:0.3Dhammacakkappavattanasutta
sn56.11:1.1Ekaṁ samayaṁ bhagavā bārāṇasiyaṁ viharati isipatane migadāye.
sn56.11:1.2Tatra kho bhagavā pañcavaggiye bhikkhū āmantesi:
sn56.11:2.1“Dveme, bhikkhave, antā pabbajitena na sevitabbā.
sn56.11:2.2Katame dve?
sn56.11:2.3Yo cāyaṁ kāmesu kāmasukhallikānuyogo hīno gammo pothujjaniko anariyo anatthasaṁhito, yo cāyaṁ attakilamathānuyogo dukkho anariyo anatthasaṁhito.
sn56.11:2.4Ete kho, bhikkhave, ubho ante anupagamma majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati.
sn56.11:3.1Katamā ca sā, bhikkhave, majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati?
sn56.11:3.2Ayameva ariyo aṭṭhaṅgiko maggo, seyyathidaṁ—
sn56.11:3.3sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi.
sn56.11:3.4Ayaṁ kho sā, bhikkhave, majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati.
sn56.11:4.1Idaṁ kho pana, bhikkhave, dukkhaṁ ariyasaccaṁ—
sn56.11:4.2jātipi dukkhā, jarāpi dukkhā, byādhipi dukkho, maraṇampi dukkhaṁ, appiyehi sampayogo dukkho, piyehi vippayogo dukkho, yampicchaṁ na labhati tampi dukkhaṁ—saṅkhittena pañcupādānakkhandhā dukkhā.
sn56.11:4.3Idaṁ kho pana, bhikkhave, dukkhasamudayaṁ ariyasaccaṁ—
sn56.11:4.4yāyaṁ taṇhā ponobbhavikā nandirāgasahagatā tatratatrābhinandinī, seyyathidaṁ—
sn56.11:4.5kāmataṇhā, bhavataṇhā, vibhavataṇhā.
sn56.11:4.6Idaṁ kho pana, bhikkhave, dukkhanirodhaṁ ariyasaccaṁ—
sn56.11:4.7yo tassāyeva taṇhāya asesavirāganirodho cāgo paṭinissaggo mutti anālayo.
sn56.11:4.8Idaṁ kho pana, bhikkhave, dukkhanirodhagāminī paṭipadā ariyasaccaṁ—
sn56.11:4.9ayameva ariyo aṭṭhaṅgiko maggo, seyyathidaṁ—
sn56.11:4.10sammādiṭṭhi …pe… sammāsamādhi.
sn56.11:5.1‘Idaṁ dukkhaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:5.2‘Taṁ kho panidaṁ dukkhaṁ ariyasaccaṁ pariññeyyan’ti me, bhikkhave, pubbe …pe… udapādi.
sn56.11:5.3‘Taṁ kho panidaṁ dukkhaṁ ariyasaccaṁ pariññātan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:6.1‘Idaṁ dukkhasamudayaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:6.2‘Taṁ kho panidaṁ dukkhasamudayaṁ ariyasaccaṁ pahātabban’ti me, bhikkhave, pubbe …pe… udapādi.
sn56.11:6.3‘Taṁ kho panidaṁ dukkhasamudayaṁ ariyasaccaṁ pahīnan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:7.1‘Idaṁ dukkhanirodhaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:7.2‘Taṁ kho panidaṁ dukkhanirodhaṁ ariyasaccaṁ sacchikātabban’ti me, bhikkhave, pubbe …pe… udapādi.
sn56.11:7.3‘Taṁ kho panidaṁ dukkhanirodhaṁ ariyasaccaṁ sacchikatan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:8.1‘Idaṁ dukkhanirodhagāminī paṭipadā ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:8.2‘Taṁ kho panidaṁ dukkhanirodhagāminī paṭipadā ariyasaccaṁ bhāvetabban’ti me, bhikkhave, pubbe …pe… udapādi.
sn56.11:8.3‘Taṁ kho panidaṁ dukkhanirodhagāminī paṭipadā ariyasaccaṁ bhāvitan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
sn56.11:9.1Yāvakīvañca me, bhikkhave, imesu catūsu ariyasaccesu evaṁ tiparivaṭṭaṁ dvādasākāraṁ yathābhūtaṁ ñāṇadassanaṁ na suvisuddhaṁ ahosi, neva tāvāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
sn56.11:10.1Yato ca kho me, bhikkhave, imesu catūsu ariyasaccesu evaṁ tiparivaṭṭaṁ dvādasākāraṁ yathābhūtaṁ ñāṇadassanaṁ suvisuddhaṁ ahosi, athāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
sn56.11:10.2Ñāṇañca pana me dassanaṁ udapādi:
sn56.11:10.3‘akuppā me vimutti, ayamantimā jāti, natthi dāni punabbhavo’”ti.
sn56.11:10.4Idamavoca bhagavā.
sn56.11:10.5Attamanā pañcavaggiyā bhikkhū bhagavato bhāsitaṁ abhinandunti.
sn56.11:11.1Imasmiñca pana veyyākaraṇasmiṁ bhaññamāne āyasmato koṇḍaññassa virajaṁ vītamalaṁ dhammacakkhuṁ udapādi:
sn56.11:11.2“yaṁ kiñci samudayadhammaṁ sabbaṁ taṁ nirodhadhamman”ti.
sn56.11:12.1Pavattite ca pana bhagavatā dhammacakke bhummā devā saddamanussāvesuṁ:
sn56.11:12.2“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.
sn56.11:12.3Bhummānaṁ devānaṁ saddaṁ sutvā cātumahārājikā devā saddamanussāvesuṁ:
sn56.11:12.4“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ, appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.
sn56.11:12.5Cātumahārājikānaṁ devānaṁ saddaṁ sutvā tāvatiṁsā devā …pe…
sn56.11:12.6yāmā devā …pe…
sn56.11:12.7tusitā devā …pe…
sn56.11:12.8nimmānaratī devā …pe…
sn56.11:12.9paranimmitavasavattī devā …pe…
sn56.11:12.10brahmakāyikā devā saddamanussāvesuṁ:
sn56.11:12.11“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.
sn56.11:13.1Itiha tena khaṇena tena layena tena muhuttena yāva brahmalokā saddo abbhuggacchi.
sn56.11:13.2Ayañca dasasahassilokadhātu saṅkampi sampakampi sampavedhi, appamāṇo ca uḷāro obhāso loke pāturahosi atikkamma devānaṁ devānubhāvanti.
sn56.11:14.1Atha kho bhagavā imaṁ udānaṁ udānesi:
sn56.11:14.2“aññāsi vata bho, koṇḍañño, aññāsi vata bho, koṇḍañño”ti.
sn56.11:14.3Iti hidaṁ āyasmato koṇḍaññassa “aññāsikoṇḍañño” tveva nāmaṁ ahosīti.
sn56.11:14.4Paṭhamaṁ.