ud1.1:0.1Udāna 1.1
ud1.1:0.2Paṭhamabodhisutta
ud1.1:1.1Evaṁ me sutaṁ—
ud1.1:1.2ekaṁ samayaṁ bhagavā uruvelāyaṁ viharati najjā nerañjarāya tīre bodhirukkhamūle paṭhamābhisambuddho.
ud1.1:1.3Tena kho pana samayena bhagavā sattāhaṁ ekapallaṅkena nisinno hoti vimuttisukhapaṭisaṁvedī.
ud1.1:1.4Atha kho bhagavā tassa sattāhassa accayena tamhā samādhimhā vuṭṭhahitvā rattiyā paṭhamaṁ yāmaṁ paṭiccasamuppādaṁ anulomaṁ sādhukaṁ manasākāsi:
ud1.1:2.1“Iti imasmiṁ sati idaṁ hoti, imassuppādā idaṁ uppajjati, yadidaṁ—
ud1.1:2.2avijjāpaccayā saṅkhārā,
ud1.1:2.3saṅkhārapaccayā viññāṇaṁ,
ud1.1:2.4viññāṇapaccayā nāmarūpaṁ,
ud1.1:2.5nāmarūpapaccayā saḷāyatanaṁ,
ud1.1:2.6saḷāyatanapaccayā phasso,
ud1.1:2.7phassapaccayā vedanā,
ud1.1:2.8vedanāpaccayā taṇhā,
ud1.1:2.9taṇhāpaccayā upādānaṁ,
ud1.1:2.10upādānapaccayā bhavo,
ud1.1:2.11bhavapaccayā jāti,
ud1.1:2.12jātipaccayā jarāmaraṇaṁ sokaparidevadukkhadomanassupāyāsā sambhavanti.
ud1.1:2.13Evametassa kevalassa dukkhakkhandhassa samudayo hotī”ti.
ud1.1:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.1:4.1“Yadā have pātubhavanti dhammā,
ud1.1:4.2Ātāpino jhāyato brāhmaṇassa;
ud1.1:4.3Athassa kaṅkhā vapayanti sabbā,
ud1.1:4.4Yato pajānāti sahetudhamman”ti.
ud1.1:4.5Paṭhamaṁ.