ud1.2:0.1Udāna 1.2
ud1.2:0.2Dutiyabodhisutta
ud1.2:1.1Evaṁ me sutaṁ—
ud1.2:1.2ekaṁ samayaṁ bhagavā uruvelāyaṁ viharati najjā nerañjarāya tīre bodhirukkhamūle paṭhamābhisambuddho.
ud1.2:1.3Tena kho pana samayena bhagavā sattāhaṁ ekapallaṅkena nisinno hoti vimuttisukhapaṭisaṁvedī.
ud1.2:1.4Atha kho bhagavā tassa sattāhassa accayena tamhā samādhimhā vuṭṭhahitvā rattiyā majjhimaṁ yāmaṁ paṭiccasamuppādaṁ paṭilomaṁ sādhukaṁ manasākāsi:
ud1.2:2.1“Iti imasmiṁ asati idaṁ na hoti, imassa nirodhā idaṁ nirujjhati, yadidaṁ—
ud1.2:2.2avijjānirodhā saṅkhāranirodho,
ud1.2:2.3saṅkhāranirodhā viññāṇanirodho,
ud1.2:2.4viññāṇanirodhā nāmarūpanirodho,
ud1.2:2.5nāmarūpanirodhā saḷāyatananirodho,
ud1.2:2.6saḷāyatananirodhā phassanirodho,
ud1.2:2.7phassanirodhā vedanānirodho,
ud1.2:2.8vedanānirodhā taṇhānirodho,
ud1.2:2.9taṇhānirodhā upādānanirodho,
ud1.2:2.10upādānanirodhā bhavanirodho,
ud1.2:2.11bhavanirodhā jātinirodho,
ud1.2:2.12jātinirodhā jarāmaraṇaṁ sokaparidevadukkhadomanassupāyāsā nirujjhanti.
ud1.2:2.13Evametassa kevalassa dukkhakkhandhassa nirodho hotī”ti.
ud1.2:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.2:4.1“Yadā have pātubhavanti dhammā,
ud1.2:4.2Ātāpino jhāyato brāhmaṇassa;
ud1.2:4.3Athassa kaṅkhā vapayanti sabbā,
ud1.2:4.4Yato khayaṁ paccayānaṁ avedī”ti.
ud1.2:4.5Dutiyaṁ.