ud1.3:0.1Udāna 1.3
ud1.3:0.2Tatiyabodhisutta
ud1.3:1.1Evaṁ me sutaṁ—
ud1.3:1.2ekaṁ samayaṁ bhagavā uruvelāyaṁ viharati najjā nerañjarāya tīre bodhirukkhamūle paṭhamābhisambuddho.
ud1.3:1.3Tena kho pana samayena bhagavā sattāhaṁ ekapallaṅkena nisinno hoti vimuttisukhapaṭisaṁvedī.
ud1.3:1.4Atha kho bhagavā tassa sattāhassa accayena tamhā samādhimhā vuṭṭhahitvā rattiyā pacchimaṁ yāmaṁ paṭiccasamuppādaṁ anulomapaṭilomaṁ sādhukaṁ manasākāsi:
ud1.3:2.1“Iti imasmiṁ sati idaṁ hoti, imassuppādā idaṁ uppajjati,
ud1.3:2.2imasmiṁ asati idaṁ na hoti, imassa nirodhā idaṁ nirujjhati; yadidaṁ—
ud1.3:2.3avijjāpaccayā saṅkhārā,
ud1.3:2.4saṅkhārapaccayā viññāṇaṁ,
ud1.3:2.5viññāṇapaccayā nāmarūpaṁ,
ud1.3:2.6nāmarūpapaccayā saḷāyatanaṁ,
ud1.3:2.7saḷāyatanapaccayā phasso,
ud1.3:2.8phassapaccayā vedanā,
ud1.3:2.9vedanāpaccayā taṇhā,
ud1.3:2.10taṇhāpaccayā upādānaṁ,
ud1.3:2.11upādānapaccayā bhavo,
ud1.3:2.12bhavapaccayā jāti,
ud1.3:2.13jātipaccayā jarāmaraṇaṁ sokaparidevadukkhadomanassupāyāsā sambhavanti.
ud1.3:2.14Evametassa kevalassa dukkhakkhandhassa samudayo hoti.
ud1.3:3.1Avijjāya tveva asesavirāganirodhā saṅkhāranirodho,
ud1.3:3.2saṅkhāranirodhā viññāṇanirodho,
ud1.3:3.3viññāṇanirodhā nāmarūpanirodho,
ud1.3:3.4nāmarūpanirodhā saḷāyatananirodho,
ud1.3:3.5saḷāyatananirodhā phassanirodho,
ud1.3:3.6phassanirodhā vedanānirodho,
ud1.3:3.7vedanānirodhā taṇhānirodho,
ud1.3:3.8taṇhānirodhā upādānanirodho,
ud1.3:3.9upādānanirodhā bhavanirodho,
ud1.3:3.10bhavanirodhā jātinirodho,
ud1.3:3.11jātinirodhā jarāmaraṇaṁ sokaparidevadukkhadomanassupāyāsā nirujjhanti.
ud1.3:3.12Evametassa kevalassa dukkhakkhandhassa nirodho hotī”ti.
ud1.3:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.3:5.1“Yadā have pātubhavanti dhammā,
ud1.3:5.2Ātāpino jhāyato brāhmaṇassa;
ud1.3:5.3Vidhūpayaṁ tiṭṭhati mārasenaṁ,
ud1.3:5.4Sūriyova obhāsayamantalikkhan”ti.
ud1.3:5.5Tatiyaṁ.