ud1.4:0.1Udāna 1.4
ud1.4:0.2Huṁhuṅkasutta
ud1.4:1.1Evaṁ me sutaṁ—
ud1.4:1.2ekaṁ samayaṁ bhagavā uruvelāyaṁ viharati najjā nerañjarāya tīre ajapālanigrodhe paṭhamābhisambuddho.
ud1.4:1.3Tena kho pana samayena bhagavā sattāhaṁ ekapallaṅkena nisinno hoti vimuttisukhapaṭisaṁvedī.
ud1.4:1.4Atha kho bhagavā tassa sattāhassa accayena tamhā samādhimhā vuṭṭhāsi.
ud1.4:2.1Atha kho aññataro huṁhuṅkajātiko brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
ud1.4:2.2Sammodanīyaṁ kathaṁ sāraṇīyaṁ vītisāretvā ekamantaṁ aṭṭhāsi. Ekamantaṁ ṭhito kho so brāhmaṇo bhagavantaṁ etadavoca:
ud1.4:2.3“kittāvatā nu kho, bho gotama, brāhmaṇo hoti, katame ca pana brāhmaṇakaraṇā dhammā”ti?
ud1.4:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.4:4.1“Yo brāhmaṇo bāhitapāpadhammo,
ud1.4:4.2Nihuṁhuṅko nikkasāvo yatatto;
ud1.4:4.3Vedantagū vūsitabrahmacariyo,
ud1.4:4.4Dhammena so brahmavādaṁ vadeyya;
ud1.4:4.5Yassussadā natthi kuhiñci loke”ti.
ud1.4:4.6Catutthaṁ.