ud1.5:0.1Udāna 1.5
ud1.5:0.2Brāhmaṇasutta
ud1.5:1.1Evaṁ me sutaṁ—
ud1.5:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud1.5:1.3Tena kho pana samayena āyasmā ca sāriputto āyasmā ca mahāmoggallāno āyasmā ca mahākassapo āyasmā ca mahākaccāno āyasmā ca mahākoṭṭhiko āyasmā ca mahākappino āyasmā ca mahācundo āyasmā ca anuruddho āyasmā ca revato āyasmā ca nando yena bhagavā tenupasaṅkamiṁsu.
ud1.5:2.1Addasā kho bhagavā te āyasmante dūratova āgacchante;
ud1.5:2.2disvāna bhikkhū āmantesi:
ud1.5:2.3“ete, bhikkhave, brāhmaṇā āgacchanti;
ud1.5:2.4ete, bhikkhave, brāhmaṇā āgacchantī”ti.
ud1.5:2.5Evaṁ vutte, aññataro brāhmaṇajātiko bhikkhu bhagavantaṁ etadavoca:
ud1.5:2.6“kittāvatā nu kho, bhante, brāhmaṇo hoti, katame ca pana brāhmaṇakaraṇā dhammā”ti?
ud1.5:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.5:4.1“Bāhitvā pāpake dhamme,
ud1.5:4.2ye caranti sadā satā;
ud1.5:4.3Khīṇasaṁyojanā buddhā,
ud1.5:4.4te ve lokasmi brāhmaṇā”ti.
ud1.5:4.5Pañcamaṁ.