ud2.3:0.1Udāna 2.3
ud2.3:0.2Daṇḍasutta
ud2.3:1.1Evaṁ me sutaṁ—
ud2.3:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud2.3:1.3Tena kho pana samayena sambahulā kumārakā antarā ca sāvatthiṁ antarā ca jetavanaṁ ahiṁ daṇḍena hananti.
ud2.3:1.4Atha kho bhagavā pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.
ud2.3:1.5Addasā kho bhagavā sambahule kumārake antarā ca sāvatthiṁ antarā ca jetavanaṁ ahiṁ daṇḍena hanante.
ud2.3:2.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.3:3.1“Sukhakāmāni bhūtāni,
ud2.3:3.2yo daṇḍena vihiṁsati;
ud2.3:3.3Attano sukhamesāno,
ud2.3:3.4pecca so na labhate sukhaṁ.
ud2.3:4.1Sukhakāmāni bhūtāni,
ud2.3:4.2yo daṇḍena na hiṁsati;
ud2.3:4.3Attano sukhamesāno,
ud2.3:4.4pecca so labhate sukhan”ti.
ud2.3:4.5Tatiyaṁ.