ud2.2:0.1Udāna 2.2
ud2.2:0.2Rājasutta
ud2.2:1.1Evaṁ me sutaṁ—
ud2.2:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud2.2:1.3Tena kho pana samayena sambahulānaṁ bhikkhūnaṁ pacchābhattaṁ piṇḍapātapaṭikkantānaṁ upaṭṭhānasālāyaṁ sannisinnānaṁ sannipatitānaṁ ayamantarākathā udapādi:
ud2.2:1.4“ko nu kho, āvuso, imesaṁ dvinnaṁ rājūnaṁ mahaddhanataro vā mahābhogataro vā mahākosataro vā mahāvijitataro vā mahāvāhanataro vā mahabbalataro vā mahiddhikataro vā mahānubhāvataro vā rājā vā māgadho seniyo bimbisāro, rājā vā pasenadi kosalo”ti?
ud2.2:1.5Ayañcarahi tesaṁ bhikkhūnaṁ antarākathā hoti vippakatā.
ud2.2:2.1Atha kho bhagavā sāyanhasamayaṁ paṭisallānā vuṭṭhito yenupaṭṭhānasālā tenupasaṅkami; upasaṅkamitvā paññatte āsane nisīdi.
ud2.2:2.2Nisajja kho bhagavā bhikkhū āmantesi:
ud2.2:2.3“kāya nuttha, bhikkhave, etarahi kathāya sannisinnā sannipatitā, kā ca pana vo antarākathā vippakatā”ti?
ud2.2:3.1“Idha, bhante, amhākaṁ pacchābhattaṁ piṇḍapātapaṭikkantānaṁ upaṭṭhānasālāyaṁ sannisinnānaṁ sannipatitānaṁ ayamantarākathā udapādi:
ud2.2:3.2‘ko nu kho, āvuso, imesaṁ dvinnaṁ rājūnaṁ mahaddhanataro vā mahābhogataro vā mahākosataro vā mahāvijitataro vā mahāvāhanataro vā mahabbalataro vā mahiddhikataro vā mahānubhāvataro vā rājā vā māgadho seniyo bimbisāro, rājā vā pasenadi kosalo’ti?
ud2.2:3.3Ayaṁ kho no, bhante, antarākathā vippakatā, atha bhagavā anuppatto”ti.
ud2.2:4.1“Na khvetaṁ, bhikkhave, tumhākaṁ patirūpaṁ kulaputtānaṁ saddhā agārasmā anagāriyaṁ pabbajitānaṁ yaṁ tumhe evarūpiṁ kathaṁ katheyyātha.
ud2.2:4.2Sannipatitānaṁ vo, bhikkhave, dvayaṁ karaṇīyaṁ—
ud2.2:4.3dhammī vā kathā ariyo vā tuṇhībhāvo”ti.
ud2.2:5.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.2:6.1“Yañca kāmasukhaṁ loke,
ud2.2:6.2yañcidaṁ diviyaṁ sukhaṁ;
ud2.2:6.3Taṇhakkhayasukhassete,
ud2.2:6.4kalaṁ nāgghanti soḷasin”ti.
ud2.2:6.5Dutiyaṁ.