ud2.1:0.1Udāna 2.1
ud2.1:0.2Mucalindasutta
ud2.1:1.1Evaṁ me sutaṁ—
ud2.1:1.2ekaṁ samayaṁ bhagavā uruvelāyaṁ viharati najjā nerañjarāya tīre mucalindamūle paṭhamābhisambuddho.
ud2.1:1.3Tena kho pana samayena bhagavā sattāhaṁ ekapallaṅkena nisinno hoti vimuttisukhapaṭisaṁvedī.
ud2.1:2.1Tena kho pana samayena mahā akālamegho udapādi sattāhavaddalikā sītavātaduddinī.
ud2.1:2.2Atha kho mucalindo nāgarājā sakabhavanā nikkhamitvā bhagavato kāyaṁ sattakkhattuṁ bhogehi parikkhipitvā uparimuddhani mahantaṁ phaṇaṁ vihacca aṭṭhāsi:
ud2.1:2.3“mā bhagavantaṁ sītaṁ, mā bhagavantaṁ uṇhaṁ, mā bhagavantaṁ ḍaṁsamakasavātātapasarīsapasamphasso”ti.
ud2.1:3.1Atha kho bhagavā tassa sattāhassa accayena tamhā samādhimhā vuṭṭhāsi.
ud2.1:3.2Atha kho mucalindo nāgarājā viddhaṁ vigatavalāhakaṁ devaṁ viditvā bhagavato kāyā bhoge viniveṭhetvā sakavaṇṇaṁ paṭisaṁharitvā māṇavakavaṇṇaṁ abhinimminitvā bhagavato purato aṭṭhāsi pañjaliko bhagavantaṁ namassamāno.
ud2.1:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.1:5.1“Sukho viveko tuṭṭhassa,
ud2.1:5.2sutadhammassa passato;
ud2.1:5.3Abyāpajjaṁ sukhaṁ loke,
ud2.1:5.4pāṇabhūtesu saṁyamo.
ud2.1:6.1Sukhā virāgatā loke,
ud2.1:6.2kāmānaṁ samatikkamo;
ud2.1:6.3Asmimānassa yo vinayo,
ud2.1:6.4etaṁ ve paramaṁ sukhan”ti.
ud2.1:6.5Paṭhamaṁ.