ud1.10:0.1Udāna 1.10
ud1.10:0.2Bāhiyasutta
ud1.10:1.1Evaṁ me sutaṁ—
ud1.10:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud1.10:1.3Tena kho pana samayena bāhiyo dārucīriyo suppārake paṭivasati samuddatīre sakkato garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ.
ud1.10:1.4Atha kho bāhiyassa dārucīriyassa rahogatassa paṭisallīnassa evaṁ cetaso parivitakko udapādi:
ud1.10:1.5“ye kho keci loke arahanto vā arahattamaggaṁ vā samāpannā, ahaṁ tesaṁ aññataro”ti.
ud1.10:2.1Atha kho bāhiyassa dārucīriyassa purāṇasālohitā devatā anukampikā atthakāmā bāhiyassa dārucīriyassa cetasā cetoparivitakkamaññāya yena bāhiyo dārucīriyo tenupasaṅkami; upasaṅkamitvā bāhiyaṁ dārucīriyaṁ etadavoca:
ud1.10:2.2“neva kho tvaṁ, bāhiya, arahā, nāpi arahattamaggaṁ vā samāpanno.
ud1.10:2.3Sāpi te paṭipadā natthi yāya tvaṁ arahā vā assa arahattamaggaṁ vā samāpanno”ti.
ud1.10:3.1“Atha ke carahi sadevake loke arahanto vā arahattamaggaṁ vā samāpannā”ti?
ud1.10:3.2“Atthi, bāhiya, uttaresu janapadesu sāvatthī nāma nagaraṁ.
ud1.10:3.3Tattha so bhagavā etarahi viharati arahaṁ sammāsambuddho.
ud1.10:3.4So hi, bāhiya, bhagavā arahā ceva arahattāya ca dhammaṁ desetī”ti.
ud1.10:4.1Atha kho bāhiyo dārucīriyo tāya devatāya saṁvejito tāvadeva suppārakamhā pakkāmi.
ud1.10:4.2Sabbattha ekarattiparivāsena yena sāvatthī jetavanaṁ anāthapiṇḍikassa ārāmo tenupasaṅkami.
ud1.10:4.3Tena kho pana samayena sambahulā bhikkhū abbhokāse caṅkamanti.
ud1.10:4.4Atha kho bāhiyo dārucīriyo yena te bhikkhū tenupasaṅkami; upasaṅkamitvā te bhikkhū etadavoca:
ud1.10:4.5“kahaṁ nu kho, bhante, etarahi bhagavā viharati arahaṁ sammāsambuddho?
ud1.10:4.6Dassanakāmamhā mayaṁ taṁ bhagavantaṁ arahantaṁ sammāsambuddhan”ti.
ud1.10:4.7“Antaragharaṁ paviṭṭho kho, bāhiya, bhagavā piṇḍāyā”ti.
ud1.10:5.1Atha kho bāhiyo dārucīriyo taramānarūpo jetavanā nikkhamitvā sāvatthiṁ pavisitvā addasa bhagavantaṁ sāvatthiyaṁ piṇḍāya carantaṁ pāsādikaṁ pasādanīyaṁ santindriyaṁ santamānasaṁ uttamadamathasamathamanuppattaṁ dantaṁ guttaṁ yatindriyaṁ nāgaṁ.
ud1.10:5.2Disvāna yena bhagavā tenupasaṅkami; upasaṅkamitvā bhagavato pāde sirasā nipatitvā bhagavantaṁ etadavoca:
ud1.10:5.3“desetu me, bhante, bhagavā dhammaṁ; desetu sugato dhammaṁ,
ud1.10:5.4yaṁ mamassa dīgharattaṁ hitāya sukhāyā”ti.
ud1.10:5.5Evaṁ vutte, bhagavā bāhiyaṁ dārucīriyaṁ etadavoca:
ud1.10:5.6“akālo kho tāva, bāhiya, antaragharaṁ paviṭṭhamhā piṇḍāyā”ti.
ud1.10:6.1Dutiyampi kho bāhiyo dārucīriyo bhagavantaṁ etadavoca:
ud1.10:6.2“dujjānaṁ kho panetaṁ, bhante, bhagavato vā jīvitantarāyānaṁ, mayhaṁ vā jīvitantarāyānaṁ.
ud1.10:6.3Desetu me, bhante, bhagavā dhammaṁ;
ud1.10:6.4desetu sugato dhammaṁ, yaṁ mamassa dīgharattaṁ hitāya sukhāyā”ti.
ud1.10:6.5Dutiyampi kho bhagavā bāhiyaṁ dārucīriyaṁ etadavoca:
ud1.10:6.6“akālo kho tāva, bāhiya, antaragharaṁ paviṭṭhamhā piṇḍāyā”ti.
ud1.10:7.1Tatiyampi kho bāhiyo dārucīriyo bhagavantaṁ etadavoca:
ud1.10:7.2“dujjānaṁ kho panetaṁ, bhante, bhagavato vā jīvitantarāyānaṁ, mayhaṁ vā jīvitantarāyānaṁ.
ud1.10:7.3Desetu me, bhante, bhagavā dhammaṁ;
ud1.10:7.4desetu sugato dhammaṁ, yaṁ mamassa dīgharattaṁ hitāya sukhāyā”ti.
ud1.10:8.1“Tasmātiha te, bāhiya, evaṁ sikkhitabbaṁ:
ud1.10:8.2‘diṭṭhe diṭṭhamattaṁ bhavissati, sute sutamattaṁ bhavissati, mute mutamattaṁ bhavissati, viññāte viññātamattaṁ bhavissatī’ti.
ud1.10:8.3Evañhi te, bāhiya, sikkhitabbaṁ.
ud1.10:8.4Yato kho te, bāhiya, diṭṭhe diṭṭhamattaṁ bhavissati, sute sutamattaṁ bhavissati, mute mutamattaṁ bhavissati, viññāte viññātamattaṁ bhavissati,
ud1.10:8.5tato tvaṁ, bāhiya, na tena.
ud1.10:8.6Yato tvaṁ, bāhiya, na tena;
ud1.10:8.7tato tvaṁ, bāhiya, na tattha.
ud1.10:8.8Yato tvaṁ, bāhiya, na tattha,
ud1.10:8.9tato tvaṁ, bāhiya, nevidha na huraṁ na ubhayamantarena.
ud1.10:8.10Esevanto dukkhassā”ti.
ud1.10:9.1Atha kho bāhiyassa dārucīriyassa bhagavato imāya saṅkhittāya dhammadesanāya tāvadeva anupādāya āsavehi cittaṁ vimucci.
ud1.10:10.1Atha kho bhagavā bāhiyaṁ dārucīriyaṁ iminā saṅkhittena ovādena ovaditvā pakkāmi.
ud1.10:10.2Atha kho acirapakkantassa bhagavato bāhiyaṁ dārucīriyaṁ gāvī taruṇavacchā adhipatitvā jīvitā voropesi.
ud1.10:11.1Atha kho bhagavā sāvatthiyaṁ piṇḍāya caritvā pacchābhattaṁ piṇḍapātapaṭikkanto sambahulehi bhikkhūhi saddhiṁ nagaramhā nikkhamitvā addasa bāhiyaṁ dārucīriyaṁ kālaṅkataṁ;
ud1.10:11.2disvāna bhikkhū āmantesi:
ud1.10:11.3“gaṇhatha, bhikkhave, bāhiyassa dārucīriyassa sarīrakaṁ; mañcakaṁ āropetvā nīharitvā jhāpetha; thūpañcassa karotha.
ud1.10:11.4Sabrahmacārī vo, bhikkhave, kālaṅkato”ti.
ud1.10:12.1“Evaṁ, bhante”ti kho te bhikkhū bhagavato paṭissutvā bāhiyassa dārucīriyassa sarīrakaṁ mañcakaṁ āropetvā nīharitvā jhāpetvā thūpañcassa katvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
ud1.10:12.2Ekamantaṁ nisinnā kho te bhikkhū bhagavantaṁ etadavocuṁ:
ud1.10:12.3“daḍḍhaṁ, bhante, bāhiyassa dārucīriyassa sarīraṁ, thūpo cassa kato.
ud1.10:12.4Tassa kā gati, ko abhisamparāyo”ti?
ud1.10:12.5“Paṇḍito, bhikkhave, bāhiyo dārucīriyo paccapādi dhammassānudhammaṁ; na ca maṁ dhammādhikaraṇaṁ vihesesi.
ud1.10:12.6Parinibbuto, bhikkhave, bāhiyo dārucīriyo”ti.
ud1.10:13.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.10:14.1“Yattha āpo ca pathavī,
ud1.10:14.2tejo vāyo na gādhati;
ud1.10:14.3Na tattha sukkā jotanti,
ud1.10:14.4ādicco nappakāsati;
ud1.10:14.5Na tattha candimā bhāti,
ud1.10:14.6tamo tattha na vijjati.
ud1.10:15.1Yadā ca attanāvedi,
ud1.10:15.2muni monena brāhmaṇo;
ud1.10:15.3Atha rūpā arūpā ca,
ud1.10:15.4sukhadukkhā pamuccatī”ti.
ud1.10:15.5Dasamaṁ.
ud1.10:16.1Ayampi udāno vutto bhagavatā iti me sutanti.
ud1.10:16.2Bodhivaggo paṭhamo.
ud1.10:17.0Tassuddānaṁ
ud1.10:17.1Tayo bodhī ca huṁhuṅko,
ud1.10:17.2brāhmaṇā kassapena ca;
ud1.10:17.3Aja saṅgāma jaṭilā,
ud1.10:17.4bāhiyenāti te dasāti.