ud1.9:0.1Udāna 1.9
ud1.9:0.2Jaṭilasutta
ud1.9:1.1Evaṁ me sutaṁ—
ud1.9:1.2ekaṁ samayaṁ bhagavā gayāyaṁ viharati gayāsīse.
ud1.9:1.3Tena kho pana samayena sambahulā jaṭilā sītāsu hemantikāsu rattīsu antaraṭṭhake himapātasamaye gayāyaṁ ummujjantipi nimujjantipi, ummujjanimujjampi karonti osiñcantipi, aggimpi juhanti:
ud1.9:1.4“iminā suddhī”ti.
ud1.9:2.1Addasā kho bhagavā te sambahule jaṭile sītāsu hemantikāsu rattīsu antaraṭṭhake himapātasamaye gayāyaṁ ummujjantepi nimujjantepi ummujjanimujjampi karonte osiñcantepi aggimpi juhante:
ud1.9:2.2“iminā suddhī”ti.
ud1.9:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.9:4.1“Na udakena sucī hoti,
ud1.9:4.2bahvettha nhāyatī jano;
ud1.9:4.3Yamhi saccañca dhammo ca,
ud1.9:4.4so sucī so ca brāhmaṇo”ti.
ud1.9:4.5Navamaṁ.