ud1.8:0.1Udāna 1.8
ud1.8:0.2Saṅgāmajisutta
ud1.8:1.1Evaṁ me sutaṁ—
ud1.8:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud1.8:1.3Tena kho pana samayena āyasmā saṅgāmaji sāvatthiṁ anuppatto hoti bhagavantaṁ dassanāya.
ud1.8:1.4Assosi kho āyasmato saṅgāmajissa purāṇadutiyikā:
ud1.8:1.5“ayyo kira saṅgāmaji sāvatthiṁ anuppatto”ti.
ud1.8:1.6Sā dārakaṁ ādāya jetavanaṁ agamāsi.
ud1.8:2.1Tena kho pana samayena āyasmā saṅgāmaji aññatarasmiṁ rukkhamūle divāvihāraṁ nisinno hoti.
ud1.8:2.2Atha kho āyasmato saṅgāmajissa purāṇadutiyikā yenāyasmā saṅgāmaji tenupasaṅkami; upasaṅkamitvā āyasmantaṁ saṅgāmajiṁ etadavoca:
ud1.8:2.3“khuddaputtañhi, samaṇa, posa man”ti.
ud1.8:2.4Evaṁ vutte, āyasmā saṅgāmaji tuṇhī ahosi.
ud1.8:3.1Dutiyampi kho āyasmato saṅgāmajissa purāṇadutiyikā āyasmantaṁ saṅgāmajiṁ etadavoca:
ud1.8:3.2“khuddaputtañhi, samaṇa, posa man”ti.
ud1.8:3.3Dutiyampi kho āyasmā saṅgāmaji tuṇhī ahosi.
ud1.8:4.1Tatiyampi kho āyasmato saṅgāmajissa purāṇadutiyikā āyasmantaṁ saṅgāmajiṁ etadavoca:
ud1.8:4.2“khuddaputtañhi, samaṇa, posa man”ti.
ud1.8:4.3Tatiyampi kho āyasmā saṅgāmaji tuṇhī ahosi.
ud1.8:5.1Atha kho āyasmato saṅgāmajissa purāṇadutiyikā taṁ dārakaṁ āyasmato saṅgāmajissa purato nikkhipitvā pakkāmi:
ud1.8:5.2“eso te, samaṇa, putto; posa nan”ti.
ud1.8:6.1Atha kho āyasmā saṅgāmaji taṁ dārakaṁ neva olokesi nāpi ālapi.
ud1.8:6.2Atha kho āyasmato saṅgāmajissa purāṇadutiyikā avidūraṁ gantvā apalokentī addasa āyasmantaṁ saṅgāmajiṁ taṁ dārakaṁ neva olokentaṁ nāpi ālapantaṁ, disvānassā etadahosi:
ud1.8:6.3“na cāyaṁ samaṇo puttenapi atthiko”ti.
ud1.8:6.4Tato paṭinivattitvā dārakaṁ ādāya pakkāmi.
ud1.8:6.5Addasā kho bhagavā dibbena cakkhunā visuddhena atikkantamānusakena āyasmato saṅgāmajissa purāṇadutiyikāya evarūpaṁ vippakāraṁ.
ud1.8:7.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud1.8:8.1“Āyantiṁ nābhinandati,
ud1.8:8.2pakkamantiṁ na socati;
ud1.8:8.3Saṅgā saṅgāmajiṁ muttaṁ,
ud1.8:8.4tamahaṁ brūmi brāhmaṇan”ti.
ud1.8:8.5Aṭṭhamaṁ.