ud2.5:0.1Udāna 2.5
ud2.5:0.2Upāsakasutta
ud2.5:1.1Evaṁ me sutaṁ—
ud2.5:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud2.5:1.3Tena kho pana samayena aññataro icchānaṅgalako upāsako sāvatthiṁ anuppatto hoti kenacideva karaṇīyena.
ud2.5:1.4Atha kho so upāsako sāvatthiyaṁ taṁ karaṇīyaṁ tīretvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud2.5:1.5Ekamantaṁ nisinnaṁ kho taṁ upāsakaṁ bhagavā etadavoca:
ud2.5:1.6“cirassaṁ kho tvaṁ, upāsaka, imaṁ pariyāyamakāsi yadidaṁ idhāgamanāyā”ti.
ud2.5:2.1“Cirapaṭikāhaṁ, bhante, bhagavantaṁ dassanāya upasaṅkamitukāmo, api cāhaṁ kehici kehici kiccakaraṇīyehi byāvaṭo. Evāhaṁ nāsakkhiṁ bhagavantaṁ dassanāya upasaṅkamitun”ti.
ud2.5:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.5:4.1“Sukhaṁ vata tassa na hoti kiñci,
ud2.5:4.2Saṅkhātadhammassa bahussutassa;
ud2.5:4.3Sakiñcanaṁ passa vihaññamānaṁ,
ud2.5:4.4Jano janasmiṁ paṭibandharūpo”ti.
ud2.5:4.5Pañcamaṁ.