ud2.6:0.1Udāna 2.6
ud2.6:0.2Gabbhinīsutta
ud2.6:1.1Evaṁ me sutaṁ—
ud2.6:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud2.6:1.3Tena kho pana samayena aññatarassa paribbājakassa daharamāṇavikā pajāpati hoti gabbhinī upavijaññā.
ud2.6:1.4Atha kho sā paribbājikā taṁ paribbājakaṁ etadavoca:
ud2.6:1.5“gaccha tvaṁ, brāhmaṇa, telaṁ āhara, yaṁ me vijātāya bhavissatī”ti.
ud2.6:2.1Evaṁ vutte, so paribbājako taṁ paribbājikaṁ etadavoca:
ud2.6:2.2“kuto panāhaṁ, bhoti, telaṁ āharāmī”ti?
ud2.6:2.3Dutiyampi kho sā paribbājikā taṁ paribbājakaṁ etadavoca:
ud2.6:2.4“gaccha tvaṁ, brāhmaṇa, telaṁ āhara, yaṁ me vijātāya bhavissatī”ti.
ud2.6:2.5Dutiyampi kho so paribbājako taṁ paribbājikaṁ etadavoca:
ud2.6:2.6“kuto panāhaṁ, bhoti, telaṁ āharāmī”ti?
ud2.6:2.7Tatiyampi kho sā paribbājikā taṁ paribbājakaṁ etadavoca:
ud2.6:2.8“gaccha tvaṁ, brāhmaṇa, telaṁ āhara, yaṁ me vijātāya bhavissatī”ti.
ud2.6:3.1Tena kho pana samayena rañño pasenadissa kosalassa koṭṭhāgāre samaṇassa vā brāhmaṇassa vā sappissa vā telassa vā yāvadatthaṁ pātuṁ dīyati, no nīharituṁ.
ud2.6:4.1Atha kho tassa paribbājakassa etadahosi:
ud2.6:4.2“rañño kho pana pasenadissa kosalassa koṭṭhāgāre samaṇassa vā brāhmaṇassa vā sappissa vā telassa vā yāvadatthaṁ pātuṁ dīyati, no nīharituṁ.
ud2.6:4.3Yannūnāhaṁ rañño pasenadissa kosalassa koṭṭhāgāraṁ gantvā telassa yāvadatthaṁ pivitvā gharaṁ āgantvā ucchadditvāna dadeyyaṁ, yaṁ imissā vijātāya bhavissatī”ti.
ud2.6:5.1Atha kho so paribbājako rañño pasenadissa kosalassa koṭṭhāgāraṁ gantvā telassa yāvadatthaṁ pivitvā gharaṁ āgantvā neva sakkoti uddhaṁ kātuṁ, na pana adho.
ud2.6:5.2So dukkhāhi tibbāhi kharāhi kaṭukāhi vedanāhi phuṭṭho āvaṭṭati parivaṭṭati.
ud2.6:6.1Atha kho bhagavā pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.
ud2.6:6.2Addasā kho bhagavā taṁ paribbājakaṁ dukkhāhi tibbāhi kharāhi kaṭukāhi vedanāhi phuṭṭhaṁ āvaṭṭamānaṁ parivaṭṭamānaṁ.
ud2.6:7.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.6:8.1“Sukhino vata ye akiñcanā,
ud2.6:8.2Vedaguno hi janā akiñcanā;
ud2.6:8.3Sakiñcanaṁ passa vihaññamānaṁ,
ud2.6:8.4Jano janasmiṁ paṭibandhacitto”ti.
ud2.6:8.5Chaṭṭhaṁ.