ud2.7:0.1Udāna 2.7
ud2.7:0.2Ekaputtakasutta
ud2.7:1.1Evaṁ me sutaṁ—
ud2.7:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud2.7:1.3Tena kho pana samayena aññatarassa upāsakassa ekaputtako piyo manāpo kālaṅkato hoti.
ud2.7:2.1Atha kho sambahulā upāsakā allavatthā allakesā divā divassa yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinne kho te upāsake bhagavā etadavoca:
ud2.7:2.2“kiṁ nu kho tumhe, upāsakā, allavatthā allakesā idhūpasaṅkamantā divā divassā”ti?
ud2.7:3.1Evaṁ vutte, so upāsako bhagavantaṁ etadavoca:
ud2.7:3.2“mayhaṁ kho, bhante, ekaputtako piyo manāpo kālaṅkato.
ud2.7:3.3Tena mayaṁ allavatthā allakesā idhūpasaṅkamantā divā divassā”ti.
ud2.7:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.7:5.1“Piyarūpassādagadhitāse,
ud2.7:5.2Devakāyā puthu manussā ca;
ud2.7:5.3Aghāvino parijunnā,
ud2.7:5.4Maccurājassa vasaṁ gacchanti.
ud2.7:6.1Ye ve divā ca ratto ca,
ud2.7:6.2Appamattā jahanti piyarūpaṁ;
ud2.7:6.3Te ve khaṇanti aghamūlaṁ,
ud2.7:6.4Maccuno āmisaṁ durativattan”ti.
ud2.7:6.5Sattamaṁ.