ud2.8:0.1Udāna 2.8
ud2.8:0.2Suppavāsāsutta
ud2.8:1.1Evaṁ me sutaṁ—
ud2.8:1.2ekaṁ samayaṁ bhagavā kuṇḍikāyaṁ viharati kuṇḍadhānavane.
ud2.8:1.3Tena kho pana samayena suppavāsā koliyadhītā satta vassāni gabbhaṁ dhāreti.
ud2.8:1.4Sattāhaṁ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti:
ud2.8:1.5“sammāsambuddho vata so bhagavā yo imassa evarūpassa dukkhassa pahānāya dhammaṁ deseti;
ud2.8:1.6suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno;
ud2.8:1.7susukhaṁ vata taṁ nibbānaṁ yatthidaṁ evarūpaṁ dukkhaṁ na saṁvijjatī”ti.
ud2.8:2.1Atha kho suppavāsā koliyadhītā sāmikaṁ āmantesi:
ud2.8:2.2“ehi tvaṁ, ayyaputta, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi; appābādhaṁ appātaṅkaṁ lahuṭṭhānaṁ balaṁ phāsuvihāraṁ puccha:
ud2.8:2.3‘suppavāsā, bhante, koliyadhītā bhagavato pāde sirasā vandati; appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchatī’ti.
ud2.8:2.4Evañca vadehi:
ud2.8:2.5‘suppavāsā, bhante, koliyadhītā satta vassāni gabbhaṁ dhāreti.
ud2.8:2.6Sattāhaṁ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti—
ud2.8:2.7sammāsambuddho vata so bhagavā yo imassa evarūpassa dukkhassa pahānāya dhammaṁ deseti;
ud2.8:2.8suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno;
ud2.8:2.9susukhaṁ vata taṁ nibbānaṁ yatthidaṁ evarūpaṁ dukkhaṁ na saṁvijjatī’”ti.
ud2.8:3.1“Paraman”ti kho so koliyaputto suppavāsāya koliyadhītāya paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud2.8:3.2Ekamantaṁ nisinno kho koliyaputto bhagavantaṁ etadavoca:
ud2.8:3.3“suppavāsā, bhante, koliyadhītā bhagavato pāde sirasā vandati, appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchati;
ud2.8:3.4evañca vadeti:
ud2.8:3.5‘suppavāsā, bhante, koliyadhītā satta vassāni gabbhaṁ dhāreti.
ud2.8:3.6Sattāhaṁ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti—
ud2.8:3.7sammāsambuddho vata so bhagavā yo imassa evarūpassa dukkhassa pahānāya dhammaṁ deseti;
ud2.8:3.8suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno;
ud2.8:3.9susukhaṁ vata nibbānaṁ yatthidaṁ evarūpaṁ dukkhaṁ na saṁvijjatī’”ti.
ud2.8:4.1“Sukhinī hotu suppavāsā koliyadhītā; arogā arogaṁ puttaṁ vijāyatū”ti.
ud2.8:4.2Saha vacanā ca pana bhagavato suppavāsā koliyadhītā sukhinī arogā arogaṁ puttaṁ vijāyi.
ud2.8:5.1“Evaṁ, bhante”ti kho so koliyaputto bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā yena sakaṁ gharaṁ tena paccāyāsi.
ud2.8:5.2Addasā kho so koliyaputto suppavāsaṁ koliyadhītaraṁ sukhiniṁ arogaṁ arogaṁ puttaṁ vijātaṁ.
ud2.8:5.3Disvānassa etadahosi:
ud2.8:5.4“acchariyaṁ vata bho, abbhutaṁ vata bho, tathāgatassa mahiddhikatā mahānubhāvatā, yatra hi nāmāyaṁ suppavāsā koliyadhītā saha vacanā ca pana bhagavato sukhinī arogā arogaṁ puttaṁ vijāyissatī”ti.
ud2.8:5.5Attamano pamudito pītisomanassajāto ahosi.
ud2.8:6.1Atha kho suppavāsā koliyadhītā sāmikaṁ āmantesi:
ud2.8:6.2“ehi tvaṁ, ayyaputta, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi:
ud2.8:6.3‘suppavāsā, bhante, koliyadhītā bhagavato pāde sirasā vandatī’ti;
ud2.8:6.4evañca vadehi:
ud2.8:6.5‘suppavāsā, bhante, koliyadhītā satta vassāni gabbhaṁ dhāreti.
ud2.8:6.6Sattāhaṁ mūḷhagabbhā sā etarahi sukhinī arogā arogaṁ puttaṁ vijātā.
ud2.8:6.7Sā sattāhaṁ buddhappamukhaṁ bhikkhusaṅghaṁ bhattena nimanteti.
ud2.8:6.8Adhivāsetu kira, bhante, bhagavā suppavāsāya koliyadhītāya satta bhattāni saddhiṁ bhikkhusaṅghenā’”ti.
ud2.8:7.1“Paraman”ti kho so koliyaputto suppavāsāya koliyadhītāya paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud2.8:7.2Ekamantaṁ nisinno kho so koliyaputto bhagavantaṁ etadavoca:
ud2.8:8.1“Suppavāsā, bhante, koliyadhītā bhagavato pāde sirasā vandati;
ud2.8:8.2evañca vadeti:
ud2.8:8.3‘suppavāsā, bhante, koliyadhītā satta vassāni gabbhaṁ dhāreti.
ud2.8:8.4Sattāhaṁ mūḷhagabbhā sā etarahi sukhinī arogā arogaṁ puttaṁ vijātā.
ud2.8:8.5Sā sattāhaṁ buddhappamukhaṁ bhikkhusaṅghaṁ bhattena nimanteti.
ud2.8:8.6Adhivāsetu kira, bhante, bhagavā suppavāsāya koliyadhītāya satta bhattāni saddhiṁ bhikkhusaṅghenā’”ti.
ud2.8:9.1Tena kho pana samayena aññatarena upāsakena buddhappamukho bhikkhusaṅgho svātanāya bhattena nimantito hoti.
ud2.8:9.2So ca upāsako āyasmato mahāmoggallānassa upaṭṭhāko hoti.
ud2.8:9.3Atha kho bhagavā āyasmantaṁ mahāmoggallānaṁ āmantesi:
ud2.8:9.4“ehi tvaṁ, moggallāna, yena so upāsako tenupasaṅkama; upasaṅkamitvā taṁ upāsakaṁ evaṁ vadehi:
ud2.8:9.5‘suppavāsā, āvuso, koliyadhītā satta vassāni gabbhaṁ dhāresi.
ud2.8:9.6Sattāhaṁ mūḷhagabbhā sā etarahi sukhinī arogā arogaṁ puttaṁ vijātā.
ud2.8:9.7Sā sattāhaṁ buddhappamukhaṁ bhikkhusaṅghaṁ bhattena nimanteti.
ud2.8:9.8Karotu suppavāsā koliyadhītā satta bhattāni, pacchā tvaṁ karissasī’ti.
ud2.8:9.9Tuyheso upaṭṭhāko”ti.
ud2.8:10.1“Evaṁ, bhante”ti kho āyasmā mahāmoggallāno bhagavato paṭissutvā yena so upāsako tenupasaṅkami; upasaṅkamitvā taṁ upāsakaṁ etadavoca:
ud2.8:10.2“suppavāsā, āvuso, koliyadhītā satta vassāni gabbhaṁ dhāreti.
ud2.8:10.3Sattāhaṁ mūḷhagabbhā sā etarahi sukhinī arogā arogaṁ puttaṁ vijātā.
ud2.8:10.4Sā sattāhaṁ buddhappamukhaṁ bhikkhusaṅghaṁ bhattena nimanteti.
ud2.8:10.5Karotu suppavāsā koliyadhītā satta bhattāni, pacchā tvaṁ karissasī”ti.
ud2.8:11.1“Sace me, bhante, ayyo mahāmoggallāno tiṇṇaṁ dhammānaṁ pāṭibhogo—
ud2.8:11.2bhogānañca jīvitassa ca saddhāya ca,
ud2.8:11.3karotu suppavāsā koliyadhītā satta bhattāni, pacchāhaṁ karissāmī”ti.
ud2.8:11.4“Dvinnaṁ kho te ahaṁ, āvuso, dhammānaṁ pāṭibhogo—
ud2.8:11.5bhogānañca jīvitassa ca.
ud2.8:11.6Saddhāya pana tvaṁyeva pāṭibhogo”ti.
ud2.8:12.1“Sace me, bhante, ayyo mahāmoggallāno dvinnaṁ dhammānaṁ pāṭibhogo—
ud2.8:12.2bhogānañca jīvitassa ca,
ud2.8:12.3karotu suppavāsā koliyadhītā satta bhattāni, pacchāhaṁ karissāmī”ti.
ud2.8:13.1Atha kho āyasmā mahāmoggallāno taṁ upāsakaṁ saññāpetvā yena bhagavā tenupasaṅkami; upasaṅkamitvā bhagavantaṁ etadavoca:
ud2.8:13.2“saññatto, bhante, so upāsako mayā;
ud2.8:13.3karotu suppavāsā koliyadhītā satta bhattāni, pacchā so karissatī”ti.
ud2.8:14.1Atha kho suppavāsā koliyadhītā sattāhaṁ buddhappamukhaṁ bhikkhusaṅghaṁ paṇītena khādanīyena bhojanīyena sahatthā santappesi sampavāresi,
ud2.8:14.2tañca dārakaṁ bhagavantaṁ vandāpesi sabbañca bhikkhusaṅghaṁ.
ud2.8:15.1Atha kho āyasmā sāriputto taṁ dārakaṁ etadavoca:
ud2.8:15.2“kacci te, dāraka, khamanīyaṁ, kacci yāpanīyaṁ, kacci na kiñci dukkhan”ti?
ud2.8:15.3“Kuto me, bhante sāriputta, khamanīyaṁ, kuto yāpanīyaṁ.
ud2.8:15.4Satta me vassāni lohitakumbhiyaṁ vutthānī”ti.
ud2.8:16.1Atha kho suppavāsā koliyadhītā:
ud2.8:16.2“putto me dhammasenāpatinā saddhiṁ mantetī”ti attamanā pamuditā pītisomanassajātā ahosi.
ud2.8:16.3Atha kho bhagavā suppavāsaṁ koliyadhītaraṁ attamanaṁ pamuditaṁ pītisomanassajātaṁ viditvā suppavāsaṁ koliyadhītaraṁ etadavoca:
ud2.8:16.4“iccheyyāsi tvaṁ, suppavāse, aññampi evarūpaṁ puttan”ti?
ud2.8:16.5“Iccheyyāmahaṁ, bhagavā, aññānipi evarūpāni satta puttānī”ti.
ud2.8:17.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.8:18.1“Asātaṁ sātarūpena,
ud2.8:18.2piyarūpena appiyaṁ;
ud2.8:18.3Dukkhaṁ sukhassa rūpena,
ud2.8:18.4pamattamativattatī”ti.
ud2.8:18.5Aṭṭhamaṁ.