ud2.9:0.1Udāna 2.9
ud2.9:0.2Visākhāsutta
ud2.9:1.1Evaṁ me sutaṁ—
ud2.9:1.2ekaṁ samayaṁ bhagavā sāvatthiyaṁ viharati pubbārāme migāramātupāsāde.
ud2.9:1.3Tena kho pana samayena visākhāya migāramātuyā kocideva attho raññe pasenadimhi kosale paṭibaddho hoti.
ud2.9:1.4Taṁ rājā pasenadi kosalo na yathādhippāyaṁ tīreti.
ud2.9:2.1Atha kho visākhā migāramātā divā divassa yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud2.9:2.2Ekamantaṁ nisinnaṁ kho visākhaṁ migāramātaraṁ bhagavā etadavoca:
ud2.9:2.3“handa kuto nu tvaṁ, visākhe, āgacchasi divā divassā”ti?
ud2.9:2.4“Idha me, bhante, kocideva attho raññe pasenadimhi kosale paṭibaddho;
ud2.9:2.5taṁ rājā pasenadi kosalo na yathādhippāyaṁ tīretī”ti.
ud2.9:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.9:4.1“Sabbaṁ paravasaṁ dukkhaṁ,
ud2.9:4.2sabbaṁ issariyaṁ sukhaṁ;
ud2.9:4.3Sādhāraṇe vihaññanti,
ud2.9:4.4yogā hi duratikkamā”ti.
ud2.9:4.5Navamaṁ.