ud2.10:0.1Udāna 2.10
ud2.10:0.2Bhaddiyasutta
ud2.10:1.1Evaṁ me sutaṁ—
ud2.10:1.2ekaṁ samayaṁ bhagavā anupiyāyaṁ viharati ambavane.
ud2.10:1.3Tena kho pana samayena āyasmā bhaddiyo kāḷīgodhāya putto araññagatopi rukkhamūlagatopi suññāgāragatopi abhikkhaṇaṁ udānaṁ udānesi:
ud2.10:1.4“aho sukhaṁ, aho sukhan”ti.
ud2.10:2.1Assosuṁ kho sambahulā bhikkhū āyasmato bhaddiyassa kāḷīgodhāya puttassa araññagatassapi rukkhamūlagatassapi suññāgāragatassapi abhikkhaṇaṁ udānaṁ udānentassa:
ud2.10:2.2“aho sukhaṁ, aho sukhan”ti.
ud2.10:2.3Sutvāna nesaṁ etadahosi:
ud2.10:2.4“nissaṁsayaṁ kho, āvuso, āyasmā bhaddiyo kāḷīgodhāya putto anabhirato brahmacariyaṁ carati,
ud2.10:2.5yaṁsa pubbe agāriyabhūtassa rajjasukhaṁ, so tamanussaramāno araññagatopi rukkhamūlagatopi suññāgāragatopi abhikkhaṇaṁ udānaṁ udānesi:
ud2.10:2.6‘aho sukhaṁ, aho sukhan’”ti.
ud2.10:3.1Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
ud2.10:3.2“āyasmā, bhante, bhaddiyo kāḷīgodhāya putto araññagatopi rukkhamūlagatopi suññāgāragatopi abhikkhaṇaṁ udānaṁ udānesi:
ud2.10:3.3‘aho sukhaṁ, aho sukhan’ti.
ud2.10:3.4Nissaṁsayaṁ kho, bhante, āyasmā bhaddiyo kāḷīgodhāya putto anabhirato brahmacariyaṁ carati.
ud2.10:3.5Yaṁsa pubbe agāriyabhūtassa rajjasukhaṁ, so tamanussaramāno araññagatopi rukkhamūlagatopi suññāgāragatopi abhikkhaṇaṁ udānaṁ udānesi:
ud2.10:3.6‘aho sukhaṁ, aho sukhan’”ti.
ud2.10:4.1Atha kho bhagavā aññataraṁ bhikkhuṁ āmantesi:
ud2.10:4.2“ehi tvaṁ, bhikkhu, mama vacanena bhaddiyaṁ bhikkhuṁ āmantehi:
ud2.10:4.3‘satthā taṁ, āvuso bhaddiya, āmantetī’”ti.
ud2.10:5.1“Evaṁ, bhante”ti kho so bhikkhu bhagavato paṭissutvā yenāyasmā bhaddiyo kāḷīgodhāya putto tenupasaṅkami; upasaṅkamitvā bhaddiyaṁ kāḷīgodhāya puttaṁ etadavoca:
ud2.10:5.2“satthā taṁ, āvuso bhaddiya, āmantetī”ti.
ud2.10:5.3“Evamāvuso”ti kho āyasmā bhaddiyo kāḷīgodhāya putto tassa bhikkhuno paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ bhaddiyaṁ kāḷīgodhāya puttaṁ bhagavā etadavoca:
ud2.10:6.1“Saccaṁ kira tvaṁ, bhaddiya, araññagatopi rukkhamūlagatopi suññāgāragatopi abhikkhaṇaṁ udānaṁ udānesi:
ud2.10:6.2‘aho sukhaṁ, aho sukhan’”ti.
ud2.10:6.3“Evaṁ, bhante”ti.
ud2.10:7.1“Kiṁ pana tvaṁ, bhaddiya, atthavasaṁ sampassamāno araññagatopi rukkhamūlagatopi suññāgāragatopi abhikkhaṇaṁ udānaṁ udānesi:
ud2.10:7.2‘aho sukhaṁ, aho sukhan’”ti.
ud2.10:7.3“Pubbe me, bhante, agāriyabhūtassa rajjaṁ kārentassa antopi antepure rakkhā susaṁvihitā ahosi, bahipi antepure rakkhā susaṁvihitā ahosi, antopi nagare rakkhā susaṁvihitā ahosi, bahipi nagare rakkhā susaṁvihitā ahosi, antopi janapade rakkhā susaṁvihitā ahosi, bahipi janapade rakkhā susaṁvihitā ahosi.
ud2.10:7.4So kho ahaṁ, bhante, evaṁ rakkhito gopito santo bhīto ubbiggo ussaṅkī utrāsī vihāsiṁ.
ud2.10:7.5Etarahi kho panāhaṁ, bhante, araññagatopi rukkhamūlagatopi suññāgāragatopi eko abhīto anubbiggo anussaṅkī anutrāsī appossukko pannalomo paradattavutto, migabhūtena cetasā viharāmi.
ud2.10:7.6Imaṁ kho ahaṁ, bhante, atthavasaṁ sampassamāno araññagatopi rukkhamūlagatopi suññāgāragatopi abhikkhaṇaṁ udānaṁ udānesiṁ:
ud2.10:7.7‘aho sukhaṁ, aho sukhan’”ti.
ud2.10:8.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud2.10:9.1“Yassantarato na santi kopā,
ud2.10:9.2Itibhavābhavatañca vītivatto;
ud2.10:9.3Taṁ vigatabhayaṁ sukhiṁ asokaṁ,
ud2.10:9.4Devā nānubhavanti dassanāyā”ti.
ud2.10:9.5Dasamaṁ.
ud2.10:9.6Mucalindavaggo dutiyo.
ud2.10:10.0Tassuddānaṁ
ud2.10:10.1Mucalindo rājā daṇḍena,
ud2.10:10.2sakkāro upāsakena ca;
ud2.10:10.3Gabbhinī ekaputto ca,
ud2.10:10.4suppavāsā visākhā ca;
ud2.10:10.5Kāḷīgodhāya bhaddiyoti.