ud3.1:0.1Udāna 3.1
ud3.1:0.2Kammavipākajasutta
ud3.1:1.1Evaṁ me sutaṁ—
ud3.1:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud3.1:1.3Tena kho pana samayena aññataro bhikkhu bhagavato avidūre nisinno hoti pallaṅkaṁ ābhujitvā ujuṁ kāyaṁ paṇidhāya purāṇakammavipākajaṁ dukkhaṁ tibbaṁ kharaṁ kaṭukaṁ vedanaṁ adhivāsento sato sampajāno avihaññamāno.
ud3.1:2.1Addasā kho bhagavā taṁ bhikkhuṁ avidūre nisinnaṁ pallaṅkaṁ ābhujitvā ujuṁ kāyaṁ paṇidhāya purāṇakammavipākajaṁ dukkhaṁ tibbaṁ kharaṁ kaṭukaṁ vedanaṁ adhivāsentaṁ sataṁ sampajānaṁ avihaññamānaṁ.
ud3.1:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.1:4.1“Sabbakammajahassa bhikkhuno,
ud3.1:4.2Dhunamānassa pure kataṁ rajaṁ;
ud3.1:4.3Amamassa ṭhitassa tādino,
ud3.1:4.4Attho natthi janaṁ lapetave”ti.
ud3.1:4.5Paṭhamaṁ.