ud3.3:0.1Udāna 3.3
ud3.3:0.2Yasojasutta
ud3.3:1.1Evaṁ me sutaṁ—
ud3.3:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud3.3:1.3Tena kho pana samayena yasojappamukhāni pañcamattāni bhikkhusatāni sāvatthiṁ anuppattāni honti bhagavantaṁ dassanāya.
ud3.3:1.4Tedha kho āgantukā bhikkhū nevāsikehi bhikkhūhi saddhiṁ paṭisammodamānā senāsanāni paññāpayamānā pattacīvarāni paṭisāmayamānā uccāsaddā mahāsaddā ahesuṁ.
ud3.3:2.1Atha kho bhagavā āyasmantaṁ ānandaṁ āmantesi:
ud3.3:2.2“ke panete, ānanda, uccāsaddā mahāsaddā kevaṭṭā maññe macchavilope”ti?
ud3.3:2.3“Etāni, bhante, yasojappamukhāni pañcamattāni bhikkhusatāni sāvatthiṁ anuppattāni bhagavantaṁ dassanāya.
ud3.3:2.4Tete āgantukā bhikkhū nevāsikehi bhikkhūhi saddhiṁ paṭisammodamānā senāsanāni paññāpayamānā pattacīvarāni paṭisāmayamānā uccāsaddā mahāsaddā”ti.
ud3.3:2.5“Tenahānanda, mama vacanena te bhikkhū āmantehi:
ud3.3:2.6‘satthā āyasmante āmantetī’”ti.
ud3.3:3.1“Evaṁ, bhante”ti kho āyasmā ānando bhagavato paṭissutvā yena te bhikkhū tenupasaṅkami; upasaṅkamitvā te bhikkhū etadavoca:
ud3.3:3.2“satthā āyasmante āmantetī”ti.
ud3.3:3.3“Evamāvuso”ti kho te bhikkhū āyasmato ānandassa paṭissutvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinne kho te bhikkhū bhagavā etadavoca:
ud3.3:4.1“Kiṁ nu tumhe, bhikkhave, uccāsaddā mahāsaddā, kevaṭṭā maññe macchavilope”ti?
ud3.3:4.2Evaṁ vutte, āyasmā yasojo bhagavantaṁ etadavoca:
ud3.3:4.3“imāni, bhante, pañcamattāni bhikkhusatāni sāvatthiṁ anuppattāni bhagavantaṁ dassanāya.
ud3.3:4.4Teme āgantukā bhikkhū nevāsikehi bhikkhūhi saddhiṁ paṭisammodamānā senāsanāni paññāpayamānā pattacīvarāni paṭisāmayamānā uccāsaddā mahāsaddā”ti.
ud3.3:4.5“Gacchatha, bhikkhave, paṇāmemi vo; na vo mama santike vatthabban”ti.
ud3.3:5.1“Evaṁ, bhante”ti kho te bhikkhū bhagavato paṭissutvā uṭṭhāyāsanā bhagavantaṁ abhivādetvā padakkhiṇaṁ katvā senāsanaṁ saṁsāmetvā pattacīvaramādāya yena vajjī tena cārikaṁ pakkamiṁsu.
ud3.3:5.2Vajjīsu anupubbena cārikaṁ caramānā yena vaggumudā nadī tenupasaṅkamiṁsu; upasaṅkamitvā vaggumudāya nadiyā tīre paṇṇakuṭiyo karitvā vassaṁ upagacchiṁsu.
ud3.3:6.1Atha kho āyasmā yasojo vassūpagato bhikkhū āmantesi:
ud3.3:6.2“bhagavatā mayaṁ, āvuso, paṇāmitā atthakāmena hitesinā, anukampakena anukampaṁ upādāya.
ud3.3:6.3Handa mayaṁ, āvuso, tathā vihāraṁ kappema yathā no viharataṁ bhagavā attamano assā”ti.
ud3.3:6.4“Evamāvuso”ti kho te bhikkhū āyasmato yasojassa paccassosuṁ.
ud3.3:6.5Atha kho te bhikkhū vūpakaṭṭhā appamattā ātāpino pahitattā viharantā tenevantaravassena sabbeva tisso vijjā sacchākaṁsu.
ud3.3:7.1Atha kho bhagavā sāvatthiyaṁ yathābhirantaṁ viharitvā yena vesālī tena cārikaṁ pakkāmi.
ud3.3:7.2Anupubbena cārikaṁ caramāno yena vesālī tadavasari.
ud3.3:7.3Tatra sudaṁ bhagavā vesāliyaṁ viharati mahāvane kūṭāgārasālāyaṁ.
ud3.3:8.1Atha kho bhagavā vaggumudātīriyānaṁ bhikkhūnaṁ cetasā ceto paricca manasi karitvā āyasmantaṁ ānandaṁ āmantesi:
ud3.3:8.2“ālokajātā viya me, ānanda, esā disā, obhāsajātā viya me, ānanda, esā disā;
ud3.3:8.3yassaṁ disāyaṁ vaggumudātīriyā bhikkhū viharanti gantuṁ appaṭikūlāsi me manasi kātuṁ.
ud3.3:8.4Pahiṇeyyāsi tvaṁ, ānanda, vaggumudātīriyānaṁ bhikkhūnaṁ santike dūtaṁ:
ud3.3:8.5‘satthā āyasmante āmanteti, satthā āyasmantānaṁ dassanakāmo’”ti.
ud3.3:9.1“Evaṁ, bhante”ti kho āyasmā ānando bhagavato paṭissutvā yena aññataro bhikkhu tenupasaṅkami; upasaṅkamitvā taṁ bhikkhuṁ etadavoca:
ud3.3:9.2“ehi tvaṁ, āvuso, yena vaggumudātīriyā bhikkhū tenupasaṅkama; upasaṅkamitvā vaggumudātīriye bhikkhū evaṁ vadehi:
ud3.3:9.3‘satthā āyasmante āmanteti, satthā āyasmantānaṁ dassanakāmo’”ti.
ud3.3:10.1“Evamāvuso”ti kho so bhikkhu āyasmato ānandassa paṭissutvā—
ud3.3:10.2seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—mahāvane kūṭāgārasālāyaṁ antarahito vaggumudāya nadiyā tīre tesaṁ bhikkhūnaṁ purato pāturahosi.
ud3.3:10.3Atha kho so bhikkhu vaggumudātīriye bhikkhū etadavoca:
ud3.3:10.4“satthā āyasmante āmanteti, satthā āyasmantānaṁ dassanakāmo”ti.
ud3.3:11.1“Evamāvuso”ti kho te bhikkhū tassa bhikkhuno paṭissutvā senāsanaṁ saṁsāmetvā pattacīvaramādāya—
ud3.3:11.2seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—vaggumudāya nadiyā tīre antarahitā mahāvane kūṭāgārasālāyaṁ bhagavato sammukhe pāturahesuṁ.
ud3.3:11.3Tena kho pana samayena bhagavā āneñjena samādhinā nisinno hoti.
ud3.3:11.4Atha kho tesaṁ bhikkhūnaṁ etadahosi:
ud3.3:11.5“katamena nu kho bhagavā vihārena etarahi viharatī”ti?
ud3.3:11.6Atha kho tesaṁ bhikkhūnaṁ etadahosi:
ud3.3:11.7“āneñjena kho bhagavā vihārena etarahi viharatī”ti.
ud3.3:11.8Sabbeva āneñjasamādhinā nisīdiṁsu.
ud3.3:12.1Atha kho āyasmā ānando abhikkantāya rattiyā, nikkhante paṭhame yāme, uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
ud3.3:12.2“abhikkantā, bhante, ratti; nikkhanto paṭhamo yāmo; ciranisinnā āgantukā bhikkhū;
ud3.3:12.3paṭisammodatu, bhante, bhagavā āgantukehi bhikkhūhī”ti.
ud3.3:12.4Evaṁ vutte, bhagavā tuṇhī ahosi.
ud3.3:13.1Dutiyampi kho āyasmā ānando abhikkantāya rattiyā, nikkhante majjhime yāme, uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
ud3.3:13.2“abhikkantā, bhante, ratti;
ud3.3:13.3nikkhanto majjhimo yāmo;
ud3.3:13.4ciranisinnā āgantukā bhikkhū;
ud3.3:13.5paṭisammodatu, bhante, bhagavā āgantukehi bhikkhūhī”ti.
ud3.3:13.6Dutiyampi kho bhagavā tuṇhī ahosi.
ud3.3:14.1Tatiyampi kho āyasmā ānando abhikkantāya rattiyā, nikkhante pacchime yāme, uddhaste aruṇe, nandimukhiyā rattiyā uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
ud3.3:14.2“abhikkantā, bhante, ratti;
ud3.3:14.3nikkhanto pacchimo yāmo;
ud3.3:14.4uddhasto aruṇo;
ud3.3:14.5nandimukhī ratti;
ud3.3:14.6ciranisinnā āgantukā bhikkhū;
ud3.3:14.7paṭisammodatu, bhante, bhagavā, āgantukehi bhikkhūhī”ti.
ud3.3:15.1Atha kho bhagavā tamhā samādhimhā vuṭṭhahitvā āyasmantaṁ ānandaṁ āmantesi:
ud3.3:15.2“sace kho tvaṁ, ānanda, jāneyyāsi ettakampi te nappaṭibhāseyya.
ud3.3:15.3Ahañca, ānanda, imāni ca pañca bhikkhusatāni sabbeva āneñjasamādhinā nisīdimhā”ti.
ud3.3:16.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.3:17.1“Yassa jito kāmakaṇḍako,
ud3.3:17.2Akkoso ca vadho ca bandhanañca;
ud3.3:17.3Pabbatova so ṭhito anejo,
ud3.3:17.4Sukhadukkhesu na vedhatī sa bhikkhū”ti.
ud3.3:17.5Tatiyaṁ.