ud3.4:0.1Udāna 3.4
ud3.4:0.2Sāriputtasutta
ud3.4:1.1Evaṁ me sutaṁ—
ud3.4:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud3.4:1.3Tena kho pana samayena āyasmā sāriputto bhagavato avidūre nisinno hoti pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
ud3.4:1.4Addasā kho bhagavā āyasmantaṁ sāriputtaṁ avidūre nisinnaṁ pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
ud3.4:2.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.4:3.1“Yathāpi pabbato selo,
ud3.4:3.2acalo suppatiṭṭhito;
ud3.4:3.3Evaṁ mohakkhayā bhikkhu,
ud3.4:3.4pabbatova na vedhatī”ti.
ud3.4:3.5Catutthaṁ.