ud3.6:0.1Udāna 3.6
ud3.6:0.2Pilindavacchasutta
ud3.6:1.1Evaṁ me sutaṁ—
ud3.6:1.2ekaṁ samayaṁ bhagavā rājagahe viharati veḷuvane kalandakanivāpe.
ud3.6:1.3Tena kho pana samayena āyasmā pilindavaccho bhikkhū vasalavādena samudācarati.
ud3.6:1.4Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
ud3.6:1.5“āyasmā, bhante, pilindavaccho bhikkhū vasalavādena samudācaratī”ti.
ud3.6:2.1Atha kho bhagavā aññataraṁ bhikkhuṁ āmantesi:
ud3.6:2.2“ehi tvaṁ, bhikkhu, mama vacanena pilindavacchaṁ bhikkhuṁ āmantehi:
ud3.6:2.3‘satthā taṁ, āvuso pilindavaccha, āmantetī’”ti.
ud3.6:2.4“Evaṁ, bhante”ti kho so bhikkhu bhagavato paṭissutvā yenāyasmā pilindavaccho tenupasaṅkami; upasaṅkamitvā āyasmantaṁ pilindavacchaṁ etadavoca:
ud3.6:2.5“satthā taṁ, āvuso pilindavaccha, āmantetī”ti.
ud3.6:3.1“Evamāvuso”ti kho āyasmā pilindavaccho tassa bhikkhuno paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ pilindavacchaṁ bhagavā etadavoca:
ud3.6:3.2“saccaṁ kira tvaṁ, vaccha, bhikkhū vasalavādena samudācarasī”ti?
ud3.6:3.3“Evaṁ, bhante”ti.
ud3.6:4.1Atha kho bhagavā āyasmato pilindavacchassa pubbenivāsaṁ manasi karitvā bhikkhū āmantesi:
ud3.6:4.2“mā kho tumhe, bhikkhave, vacchassa bhikkhuno ujjhāyittha.
ud3.6:4.3Na, bhikkhave, vaccho dosantaro bhikkhū vasalavādena samudācarati.
ud3.6:4.4Vacchassa, bhikkhave, bhikkhuno pañca jātisatāni abbokiṇṇāni brāhmaṇakule paccājātāni.
ud3.6:4.5So tassa vasalavādo dīgharattaṁ samudāciṇṇo.
ud3.6:4.6Tenāyaṁ vaccho bhikkhū vasalavādena samudācaratī”ti.
ud3.6:5.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.6:6.1“Yamhi na māyā vasatī na māno,
ud3.6:6.2Yo vītalobho amamo nirāso;
ud3.6:6.3Paṇunnakodho abhinibbutatto,
ud3.6:6.4So brāhmaṇo so samaṇo sa bhikkhū”ti.
ud3.6:6.5Chaṭṭhaṁ.