ud3.8:0.1Udāna 3.8
ud3.8:0.2Piṇḍapātikasutta
ud3.8:1.1Evaṁ me sutaṁ—
ud3.8:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud3.8:1.3Tena kho pana samayena sambahulānaṁ bhikkhūnaṁ pacchābhattaṁ piṇḍapātapaṭikkantānaṁ karerimaṇḍalamāḷe sannisinnānaṁ sannipatitānaṁ ayamantarākathā udapādi:
ud3.8:2.1“Piṇḍapātiko, āvuso, bhikkhu piṇḍāya caranto labhati kālena kālaṁ manāpike cakkhunā rūpe passituṁ, labhati kālena kālaṁ manāpike sotena sadde sotuṁ, labhati kālena kālaṁ manāpike ghānena gandhe ghāyituṁ, labhati kālena kālaṁ manāpike jivhāya rase sāyituṁ, labhati kālena kālaṁ manāpike kāyena phoṭṭhabbe phusituṁ.
ud3.8:2.2Piṇḍapātiko, āvuso, bhikkhu sakkato garukato mānito pūjito apacito piṇḍāya carati.
ud3.8:2.3Handāvuso, mayampi piṇḍapātikā homa.
ud3.8:2.4Mayampi lacchāma kālena kālaṁ manāpike cakkhunā rūpe passituṁ, mayampi lacchāma kālena kālaṁ manāpike sotena sadde sotuṁ, mayampi lacchāma kālena kālaṁ manāpike ghānena gandhe ghāyituṁ, mayampi lacchāma kālena kālaṁ manāpike jivhāya rase sāyituṁ, mayampi lacchāma kālena kālaṁ manāpike kāyena phoṭṭhabbe phusituṁ;
ud3.8:2.5mayampi sakkatā garukatā mānitā pūjitā apacitā piṇḍāya carissāmā”ti.
ud3.8:2.6Ayañcarahi tesaṁ bhikkhūnaṁ antarākathā hoti vippakatā.
ud3.8:3.1Atha kho bhagavā sāyanhasamayaṁ paṭisallānā vuṭṭhito yena karerimaṇḍalamāḷo tenupasaṅkami; upasaṅkamitvā paññatte āsane nisīdi.
ud3.8:3.2Nisajja kho bhagavā bhikkhū āmantesi:
ud3.8:3.3“kāya nuttha, bhikkhave, etarahi kathāya sannisinnā, kā ca pana vo antarākathā vippakatā”ti?
ud3.8:4.1“Idha, bhante, amhākaṁ pacchābhattaṁ piṇḍapātapaṭikkantānaṁ karerimaṇḍalamāḷe sannisinnānaṁ sannipatitānaṁ ayamantarākathā udapādi:
ud3.8:5.1‘Piṇḍapātiko, āvuso, bhikkhu piṇḍāya caranto labhati kālena kālaṁ manāpike cakkhunā rūpe passituṁ, labhati kālena kālaṁ manāpike sotena sadde sotuṁ, labhati kālena kālaṁ manāpike ghānena gandhe ghāyituṁ, labhati kālena kālaṁ manāpike jivhāya rase sāyituṁ, labhati kālena kālaṁ manāpike kāyena phoṭṭhabbe phusituṁ.
ud3.8:5.2Piṇḍapātiko, āvuso, bhikkhu sakkato garukato mānito pūjito apacito piṇḍāya carati.
ud3.8:5.3Handāvuso, mayampi piṇḍapātikā homa.
ud3.8:5.4Mayampi lacchāma kālena kālaṁ manāpike cakkhunā rūpe passituṁ …pe…
ud3.8:5.5kāyena phoṭṭhabbe phusituṁ.
ud3.8:5.6Mayampi sakkatā garukatā mānitā pūjitā apacitā piṇḍāya carissāmā’ti.
ud3.8:5.7Ayaṁ kho no, bhante, antarākathā vippakatā, atha bhagavā anuppatto”ti.
ud3.8:6.1“Na khvetaṁ, bhikkhave, tumhākaṁ patirūpaṁ kulaputtānaṁ saddhā agārasmā anagāriyaṁ pabbajitānaṁ yaṁ tumhe evarūpiṁ kathaṁ katheyyātha.
ud3.8:6.2Sannipatitānaṁ vo, bhikkhave, dvayaṁ karaṇīyaṁ—
ud3.8:6.3dhammī vā kathā ariyo vā tuṇhībhāvo”ti.
ud3.8:7.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.8:8.1“Piṇḍapātikassa bhikkhuno,
ud3.8:8.2Attabharassa anaññaposino;
ud3.8:8.3Devā pihayanti tādino,
ud3.8:8.4No ce saddasilokanissito”ti.
ud3.8:8.5Aṭṭhamaṁ.