ud3.9:0.1Udāna 3.9
ud3.9:0.2Sippasutta
ud3.9:1.1Evaṁ me sutaṁ—
ud3.9:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud3.9:1.3Tena kho pana samayena sambahulānaṁ bhikkhūnaṁ pacchābhattaṁ piṇḍapātapaṭikkantānaṁ maṇḍalamāḷe sannisinnānaṁ sannipatitānaṁ ayamantarākathā udapādi:
ud3.9:1.4“ko nu kho, āvuso, sippaṁ jānāti?
ud3.9:1.5Ko kiṁ sippaṁ sikkhi?
ud3.9:1.6Kataraṁ sippaṁ sippānaṁ aggan”ti?
ud3.9:2.1Tatthekacce evamāhaṁsu:
ud3.9:2.2“hatthisippaṁ sippānaṁ aggan”ti.
ud3.9:2.3Ekacce evamāhaṁsu:
ud3.9:2.4“assasippaṁ sippānaṁ aggan”ti.
ud3.9:2.5Ekacce evamāhaṁsu:
ud3.9:2.6“rathasippaṁ sippānaṁ aggan”ti.
ud3.9:2.7Ekacce evamāhaṁsu:
ud3.9:2.8“dhanusippaṁ sippānaṁ aggan”ti.
ud3.9:2.9Ekacce evamāhaṁsu:
ud3.9:2.10“tharusippaṁ sippānaṁ aggan”ti.
ud3.9:2.11Ekacce evamāhaṁsu:
ud3.9:2.12“muddāsippaṁ sippānaṁ aggan”ti.
ud3.9:2.13Ekacce evamāhaṁsu:
ud3.9:2.14“gaṇanāsippaṁ sippānaṁ aggan”ti.
ud3.9:2.15Ekacce evamāhaṁsu:
ud3.9:2.16“saṅkhānasippaṁ sippānaṁ aggan”ti.
ud3.9:2.17Ekacce evamāhaṁsu:
ud3.9:2.18“lekhāsippaṁ sippānaṁ aggan”ti.
ud3.9:2.19Ekacce evamāhaṁsu:
ud3.9:2.20“kāveyyasippaṁ sippānaṁ aggan”ti.
ud3.9:2.21Ekacce evamāhaṁsu:
ud3.9:2.22“lokāyatasippaṁ sippānaṁ aggan”ti.
ud3.9:2.23Ekacce evamāhaṁsu:
ud3.9:2.24“khattavijjāsippaṁ sippānaṁ aggan”ti.
ud3.9:2.25Ayañcarahi tesaṁ bhikkhūnaṁ antarākathā hoti vippakatā.
ud3.9:3.1Atha kho bhagavā sāyanhasamayaṁ paṭisallānā vuṭṭhito yena maṇḍalamāḷo tenupasaṅkami; upasaṅkamitvā paññatte āsane nisīdi.
ud3.9:3.2Nisajja kho bhagavā bhikkhū āmantesi:
ud3.9:3.3“kāya nuttha, bhikkhave, etarahi kathāya sannisinnā, kā ca pana vo antarākathā vippakatā”ti?
ud3.9:4.1“Idha, bhante, amhākaṁ pacchābhattaṁ piṇḍapātapaṭikkantānaṁ maṇḍalamāḷe sannisinnānaṁ ayamantarākathā udapādi:
ud3.9:4.2‘ko nu kho, āvuso, sippaṁ jānāti?
ud3.9:4.3Ko kiṁ sippaṁ sikkhi?
ud3.9:4.4Kataraṁ sippaṁ sippānaṁ aggan’ti?
ud3.9:5.1Tatthekacce evamāhaṁsu:
ud3.9:5.2‘hatthisippaṁ sippānaṁ aggan’ti.
ud3.9:5.3Ekacce evamāhaṁsu:
ud3.9:5.4‘assasippaṁ sippānaṁ aggan’ti.
ud3.9:5.5Ekacce evamāhaṁsu:
ud3.9:5.6‘rathasippaṁ sippānaṁ aggan’ti.
ud3.9:5.7Ekacce evamāhaṁsu:
ud3.9:5.8‘dhanusippaṁ sippānaṁ aggan’ti.
ud3.9:5.9Ekacce evamāhaṁsu:
ud3.9:5.10‘tharusippaṁ sippānaṁ aggan’ti.
ud3.9:5.11Ekacce evamāhaṁsu:
ud3.9:5.12‘muddāsippaṁ sippānaṁ aggan’ti.
ud3.9:5.13Ekacce evamāhaṁsu:
ud3.9:5.14‘gaṇanāsippaṁ sippānaṁ aggan’ti.
ud3.9:5.15Ekacce evamāhaṁsu:
ud3.9:5.16‘saṅkhānasippaṁ sippānaṁ aggan’ti.
ud3.9:5.17Ekacce evamāhaṁsu:
ud3.9:5.18‘lekhāsippaṁ sippānaṁ aggan’ti.
ud3.9:5.19Ekacce evamāhaṁsu:
ud3.9:5.20‘kāveyyasippaṁ sippānaṁ aggan’ti.
ud3.9:5.21Ekacce evamāhaṁsu:
ud3.9:5.22‘lokāyatasippaṁ sippānaṁ aggan’ti.
ud3.9:5.23Ekacce evamāhaṁsu:
ud3.9:5.24‘khattavijjāsippaṁ sippānaṁ aggan’ti.
ud3.9:5.25Ayaṁ kho no, bhante, antarākathā hoti vippakatā, atha bhagavā anuppatto”ti.
ud3.9:6.1“Na khvetaṁ, bhikkhave, tumhākaṁ patirūpaṁ kulaputtānaṁ saddhā agārasmā anagāriyaṁ pabbajitānaṁ yaṁ tumhe evarūpiṁ kathaṁ katheyyātha.
ud3.9:6.2Sannipatitānaṁ vo, bhikkhave, dvayaṁ karaṇīyaṁ—
ud3.9:6.3dhammī vā kathā ariyo vā tuṇhībhāvo”ti.
ud3.9:7.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.9:8.1“Asippajīvī lahu atthakāmo,
ud3.9:8.2Yatindriyo sabbadhi vippamutto;
ud3.9:8.3Anokasārī amamo nirāso,
ud3.9:8.4Hitvā mānaṁ ekacaro sa bhikkhū”ti.
ud3.9:8.5Navamaṁ.