ud3.10:0.1Udāna 3.10
ud3.10:0.2Lokasutta
ud3.10:1.1Evaṁ me sutaṁ—
ud3.10:1.2ekaṁ samayaṁ bhagavā uruvelāyaṁ viharati najjā nerañjarāya tīre bodhirukkhamūle paṭhamābhisambuddho.
ud3.10:1.3Tena kho pana samayena bhagavā sattāhaṁ ekapallaṅkena nisinno hoti vimuttisukhapaṭisaṁvedī.
ud3.10:2.1Atha kho bhagavā tassa sattāhassa accayena tamhā samādhimhā vuṭṭhahitvā buddhacakkhunā lokaṁ volokesi.
ud3.10:2.2Addasā kho bhagavā buddhacakkhunā volokento satte anekehi santāpehi santappamāne, anekehi ca pariḷāhehi pariḍayhamāne—
ud3.10:2.3rāgajehipi, dosajehipi, mohajehipi.
ud3.10:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.10:4.1“Ayaṁ loko santāpajāto,
ud3.10:4.2Phassapareto rogaṁ vadati attato;
ud3.10:4.3Yena yena hi maññati,
ud3.10:4.4Tato taṁ hoti aññathā.
ud3.10:5.1Aññathābhāvī bhavasatto loko,
ud3.10:5.2Bhavapareto bhavamevābhinandati;
ud3.10:5.3Yadabhinandati taṁ bhayaṁ,
ud3.10:5.4Yassa bhāyati taṁ dukkhaṁ;
ud3.10:5.5Bhavavippahānāya kho,
ud3.10:5.6Panidaṁ brahmacariyaṁ vussati.
ud3.10:6.1‘Ye hi keci samaṇā vā brāhmaṇā vā bhavena bhavassa vippamokkhamāhaṁsu, sabbe te avippamuttā bhavasmā’ti vadāmi.
ud3.10:6.2‘Ye vā pana keci samaṇā vā brāhmaṇā vā vibhavena bhavassa nissaraṇamāhaṁsu, sabbe te anissaṭā bhavasmā’ti vadāmi.
ud3.10:7.1Upadhiñhi paṭicca dukkhamidaṁ sambhoti, sabbupādānakkhayā natthi dukkhassa sambhavo.
ud3.10:7.2Lokamimaṁ passa;
ud3.10:7.3puthū avijjāya paretā bhūtā bhūtaratā aparimuttā;
ud3.10:7.4ye hi keci bhavā sabbadhi sabbatthatāya sabbe te bhavā aniccā dukkhā vipariṇāmadhammāti.
ud3.10:8.1Evametaṁ yathābhūtaṁ,
ud3.10:8.2Sammappaññāya passato;
ud3.10:8.3Bhavataṇhā pahīyati,
ud3.10:8.4Vibhavaṁ nābhinandati;
ud3.10:8.5Sabbaso taṇhānaṁ khayā,
ud3.10:8.6Asesavirāganirodho nibbānaṁ.
ud3.10:9.1Tassa nibbutassa bhikkhuno,
ud3.10:9.2Anupādā punabbhavo na hoti;
ud3.10:9.3Abhibhūto māro vijitasaṅgāmo,
ud3.10:9.4Upaccagā sabbabhavāni tādī”ti.
ud3.10:9.5Dasamaṁ.
ud3.10:9.6Nandavaggo tatiyo.
ud3.10:10.0Tassuddānaṁ
ud3.10:10.1Kammaṁ nando yasojo ca,
ud3.10:10.2sāriputto ca kolito;
ud3.10:10.3Pilindo kassapo piṇḍo,
ud3.10:10.4sippaṁ lokena te dasāti.