ud4.1:0.1Udāna 4.1
ud4.1:0.2Meghiyasutta
ud4.1:1.1Evaṁ me sutaṁ—
ud4.1:1.2ekaṁ samayaṁ bhagavā cālikāyaṁ viharati cālike pabbate.
ud4.1:1.3Tena kho pana samayena āyasmā meghiyo bhagavato upaṭṭhāko hoti.
ud4.1:1.4Atha kho āyasmā meghiyo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho āyasmā meghiyo bhagavantaṁ etadavoca:
ud4.1:1.5“icchāmahaṁ, bhante, jantugāmaṁ piṇḍāya pavisitun”ti.
ud4.1:1.6“Yassadāni tvaṁ, meghiya, kālaṁ maññasī”ti.
ud4.1:2.1Atha kho āyasmā meghiyo pubbaṇhasamayaṁ nivāsetvā pattacīvaramādāya jantugāmaṁ piṇḍāya pāvisi.
ud4.1:2.2Jantugāme piṇḍāya caritvā pacchābhattaṁ piṇḍapātapaṭikkanto yena kimikāḷāya nadiyā tīraṁ tenupasaṅkami.
ud4.1:2.3Addasā kho āyasmā meghiyo kimikāḷāya nadiyā tīre jaṅghāvihāraṁ anucaṅkamamāno anuvicaramāno ambavanaṁ pāsādikaṁ manuññaṁ ramaṇīyaṁ.
ud4.1:2.4Disvānassa etadahosi:
ud4.1:2.5“pāsādikaṁ vatidaṁ ambavanaṁ manuññaṁ ramaṇīyaṁ. Alaṁ vatidaṁ kulaputtassa padhānatthikassa padhānāya.
ud4.1:2.6Sace maṁ bhagavā anujāneyya, āgaccheyyāhaṁ imaṁ ambavanaṁ padhānāyā”ti.
ud4.1:3.1Atha kho āyasmā meghiyo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud4.1:3.2Ekamantaṁ nisinno kho āyasmā meghiyo bhagavantaṁ etadavoca:
ud4.1:4.1“Idhāhaṁ, bhante, pubbaṇhasamayaṁ nivāsetvā pattacīvaramādāya jantugāmaṁ piṇḍāya pāvisiṁ.
ud4.1:4.2Jantugāme piṇḍāya caritvā pacchābhattaṁ piṇḍapātapaṭikkanto yena kimikāḷāya nadiyā tīraṁ tenupasaṅkamiṁ.
ud4.1:4.3Addasaṁ kho ahaṁ, bhante, kimikāḷāya nadiyā tīre jaṅghāvihāraṁ anucaṅkamamāno anuvicaramāno ambavanaṁ pāsādikaṁ manuññaṁ ramaṇīyaṁ.
ud4.1:4.4Disvāna me etadahosi:
ud4.1:4.5‘pāsādikaṁ vatidaṁ ambavanaṁ manuññaṁ ramaṇīyaṁ.
ud4.1:4.6Alaṁ vatidaṁ kulaputtassa padhānatthikassa padhānāya.
ud4.1:4.7Sace maṁ bhagavā anujāneyya, āgaccheyyāhaṁ imaṁ ambavanaṁ padhānāyā’ti.
ud4.1:4.8Sace maṁ, bhante, bhagavā anujānāti, gaccheyyāhaṁ taṁ ambavanaṁ padhānāyā”ti.
ud4.1:5.1Evaṁ vutte, bhagavā āyasmantaṁ meghiyaṁ etadavoca:
ud4.1:5.2“āgamehi tāva, meghiya, ekakamhi tāva, yāva aññopi koci bhikkhu āgacchatī”ti.
ud4.1:6.1Dutiyampi kho āyasmā meghiyo bhagavantaṁ etadavoca:
ud4.1:6.2“bhagavato, bhante, natthi kiñci uttari karaṇīyaṁ, natthi katassa vā paticayo.
ud4.1:6.3Mayhaṁ kho pana, bhante, atthi uttari karaṇīyaṁ, atthi katassa paticayo.
ud4.1:6.4Sace maṁ bhagavā anujānāti, gaccheyyāhaṁ taṁ ambavanaṁ padhānāyā”ti.
ud4.1:6.5Dutiyampi kho bhagavā āyasmantaṁ meghiyaṁ etadavoca:
ud4.1:6.6“āgamehi tāva, meghiya, ekakamhi tāva, yāva aññopi koci bhikkhu āgacchatī”ti.
ud4.1:7.1Tatiyampi kho āyasmā meghiyo bhagavantaṁ etadavoca:
ud4.1:7.2“bhagavato, bhante, natthi kiñci uttari karaṇīyaṁ, natthi katassa vā paticayo.
ud4.1:7.3Mayhaṁ kho pana, bhante, atthi uttari karaṇīyaṁ, atthi katassa paticayo.
ud4.1:7.4Sace maṁ bhagavā anujānāti, gaccheyyāhaṁ taṁ ambavanaṁ padhānāyā”ti.
ud4.1:7.5“Padhānanti kho, meghiya, vadamānaṁ kinti vadeyyāma?
ud4.1:7.6Yassadāni tvaṁ, meghiya, kālaṁ maññasī”ti.
ud4.1:8.1Atha kho āyasmā meghiyo uṭṭhāyāsanā bhagavantaṁ abhivādetvā padakkhiṇaṁ katvā yena taṁ ambavanaṁ tenupasaṅkami; upasaṅkamitvā taṁ ambavanaṁ ajjhogāhetvā aññatarasmiṁ rukkhamūle divāvihāraṁ nisīdi.
ud4.1:8.2Atha kho āyasmato meghiyassa tasmiṁ ambavane viharantassa yebhuyyena tayo pāpakā akusalā vitakkā samudācaranti, seyyathidaṁ—
ud4.1:8.3kāmavitakko, byāpādavitakko, vihiṁsāvitakko.
ud4.1:9.1Atha kho āyasmato meghiyassa etadahosi:
ud4.1:9.2“acchariyaṁ vata bho, abbhutaṁ vata bho.
ud4.1:9.3Saddhāya ca vatamhā agārasmā anagāriyaṁ pabbajitā.
ud4.1:9.4Atha ca panimehi tīhi pāpakehi akusalehi vitakkehi anvāsattā, seyyathidaṁ—
ud4.1:9.5kāmavitakkena, byāpādavitakkena, vihiṁsāvitakkena”.
ud4.1:10.1Atha kho āyasmā meghiyo sāyanhasamayaṁ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā meghiyo bhagavantaṁ etadavoca:
ud4.1:10.2“idha mayhaṁ, bhante, tasmiṁ ambavane viharantassa yebhuyyena tayo pāpakā akusalā vitakkā samudācaranti, seyyathidaṁ—
ud4.1:10.3kāmavitakko, byāpādavitakko, vihiṁsāvitakko.
ud4.1:10.4Tassa mayhaṁ, bhante, etadahosi:
ud4.1:10.5‘acchariyaṁ vata bho, abbhutaṁ vata bho.
ud4.1:10.6Saddhāya ca vatamhā agārasmā anagāriyaṁ pabbajitā.
ud4.1:10.7Atha ca panimehi tīhi pāpakehi akusalehi vitakkehi anvāsattā, seyyathidaṁ—
ud4.1:10.8kāmavitakkena, byāpādavitakkena, vihiṁsāvitakkena’”.
ud4.1:11.1“Aparipakkāya, meghiya, cetovimuttiyā pañca dhammā paripākāya saṁvattanti.
ud4.1:11.2Katame pañca?
ud4.1:12.1Idha, meghiya, bhikkhu kalyāṇamitto hoti kalyāṇasahāyo kalyāṇasampavaṅko.
ud4.1:12.2Aparipakkāya, meghiya, cetovimuttiyā ayaṁ paṭhamo dhammo paripākāya saṁvattati.
ud4.1:13.1Puna caparaṁ, meghiya, bhikkhu sīlavā hoti, pātimokkhasaṁvarasaṁvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu.
ud4.1:13.2Aparipakkāya, meghiya, cetovimuttiyā ayaṁ dutiyo dhammo paripākāya saṁvattati.
ud4.1:14.1Puna caparaṁ, meghiya, bhikkhu yāyaṁ kathā abhisallekhikā cetovivaraṇasappāyā ekantanibbidāya virāgāya nirodhāya upasamāya abhiññāya sambodhāya nibbānāya saṁvattati, seyyathidaṁ—appicchakathā, santuṭṭhikathā, pavivekakathā, asaṁsaggakathā, vīriyārambhakathā, sīlakathā, samādhikathā, paññākathā, vimuttikathā, vimuttiñāṇadassanakathā; evarūpāya kathāya nikāmalābhī hoti akicchalābhī akasiralābhī.
ud4.1:14.2Aparipākāya, meghiya, cetovimuttiyā ayaṁ tatiyo dhammo paripākāya saṁvattati.
ud4.1:15.1Puna caparaṁ, meghiya, bhikkhu āraddhavīriyo viharati, akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
ud4.1:15.2Aparipakkāya, meghiya, cetovimuttiyā ayaṁ catuttho dhammo paripākāya saṁvattati.
ud4.1:16.1Puna caparaṁ, meghiya, bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
ud4.1:16.2Aparipakkāya, meghiya, cetovimuttiyā ayaṁ pañcamo dhammo paripākāya saṁvattati.
ud4.1:16.3Aparipakkāya, meghiya, cetovimuttiyā ime pañca dhammā paripākāya saṁvattanti.
ud4.1:17.1Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa yaṁ sīlavā bhavissati, pātimokkhasaṁvarasaṁvuto viharissati, ācāragocarasampanno, aṇumattesu vajjesu bhayadassāvī, samādāya sikkhissati sikkhāpadesu.
ud4.1:18.1Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa yaṁ yāyaṁ kathā abhisallekhikā cetovivaraṇasappāyā ekantanibbidāya virāgāya nirodhāya upasamāya abhiññāya sambodhāya nibbānāya saṁvattati, seyyathidaṁ—appicchakathā, santuṭṭhikathā, pavivekakathā, asaṁsaggakathā, vīriyārambhakathā, sīlakathā, samādhikathā, paññākathā, vimuttikathā, vimuttiñāṇadassanakathā; evarūpāya kathāya nikāmalābhī bhavissati akicchalābhī akasiralābhī.
ud4.1:19.1Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa yaṁ āraddhavīriyo viharissati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
ud4.1:20.1Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa yaṁ paññavā bhavissati, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
ud4.1:21.1Tena ca pana, meghiya, bhikkhunā imesu pañcasu dhammesu patiṭṭhāya cattāro dhammā uttari bhāvetabbā—
ud4.1:21.2asubhā bhāvetabbā rāgassa pahānāya, mettā bhāvetabbā byāpādassa pahānāya, ānāpānassati bhāvetabbā vitakkupacchedāya, aniccasaññā bhāvetabbā asmimānasamugghātāya.
ud4.1:21.3Aniccasaññino hi, meghiya, anattasaññā saṇṭhāti,
ud4.1:21.4anattasaññī asmimānasamugghātaṁ pāpuṇāti diṭṭheva dhamme nibbānan”ti.
ud4.1:22.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud4.1:23.1“Khuddā vitakkā sukhumā vitakkā,
ud4.1:23.2Anugatā manaso uppilāvā;
ud4.1:23.3Ete avidvā manaso vitakke,
ud4.1:23.4Hurā huraṁ dhāvati bhantacitto.
ud4.1:24.1Ete ca vidvā manaso vitakke,
ud4.1:24.2Ātāpiyo saṁvaratī satīmā;
ud4.1:24.3Anugate manaso uppilāve,
ud4.1:24.4Asesamete pajahāsi buddho”ti.
ud4.1:24.5Paṭhamaṁ.