ud4.2:0.1Udāna 4.2
ud4.2:0.2Uddhatasutta
ud4.2:1.1Evaṁ me sutaṁ—
ud4.2:1.2ekaṁ samayaṁ bhagavā kusinārāyaṁ viharati upavattane mallānaṁ sālavane.
ud4.2:1.3Tena kho pana samayena sambahulā bhikkhū bhagavato avidūre araññakuṭikāyaṁ viharanti uddhatā unnaḷā capalā mukharā vikiṇṇavācā muṭṭhassatino asampajānā asamāhitā vibbhantacittā pākatindriyā.
ud4.2:2.1Addasā kho bhagavā te sambahule bhikkhū avidūre araññakuṭikāyaṁ viharante uddhate unnaḷe capale mukhare vikiṇṇavāce muṭṭhassatino asampajāne asamāhite vibbhantacitte pākatindriye.
ud4.2:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud4.2:4.1“Arakkhitena kāyena,
ud4.2:4.2micchādiṭṭhihatena ca;
ud4.2:4.3Thinamiddhābhibhūtena,
ud4.2:4.4vasaṁ mārassa gacchati.
ud4.2:5.1Tasmā rakkhitacittassa,
ud4.2:5.2sammāsaṅkappagocaro;
ud4.2:5.3Sammādiṭṭhipurekkhāro,
ud4.2:5.4ñatvāna udayabbayaṁ;
ud4.2:5.5Thinamiddhābhibhū bhikkhu,
ud4.2:5.6sabbā duggatiyo jahe”ti.
ud4.2:5.7Dutiyaṁ.