ud4.6:0.1Udāna 4.6
ud4.6:0.2Piṇḍolasutta
ud4.6:1.1Evaṁ me sutaṁ—
ud4.6:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud4.6:1.3Tena kho pana samayena āyasmā piṇḍolabhāradvājo bhagavato avidūre nisinno hoti pallaṅkaṁ ābhujitvā ujuṁ kāyaṁ paṇidhāya āraññiko piṇḍapātiko paṁsukūliko tecīvariko appiccho santuṭṭho pavivitto asaṁsaṭṭho āraddhavīriyo dhutavādo adhicittamanuyutto.
ud4.6:2.1Addasā kho bhagavā āyasmantaṁ piṇḍolabhāradvājaṁ avidūre nisinnaṁ pallaṅkaṁ ābhujitvā ujuṁ kāyaṁ paṇidhāya āraññikaṁ piṇḍapātikaṁ paṁsukūlikaṁ tecīvarikaṁ appicchaṁ santuṭṭhaṁ pavivittaṁ asaṁsaṭṭhaṁ āraddhavīriyaṁ dhutavādaṁ adhicittamanuyuttaṁ.
ud4.6:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud4.6:4.1“Anūpavādo anūpaghāto,
ud4.6:4.2Pātimokkhe ca saṁvaro;
ud4.6:4.3Mattaññutā ca bhattasmiṁ,
ud4.6:4.4Pantañca sayanāsanaṁ;
ud4.6:4.5Adhicitte ca āyogo,
ud4.6:4.6Etaṁ buddhāna sāsanan”ti.
ud4.6:4.7Chaṭṭhaṁ.