ud5.4:0.1Udāna 5.4
ud5.4:0.2Kumārakasutta
ud5.4:1.1Evaṁ me sutaṁ—
ud5.4:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud5.4:1.3Tena kho pana samayena sambahulā kumārakā antarā ca sāvatthiṁ antarā ca jetavanaṁ macchake bādhenti.
ud5.4:2.1Atha kho bhagavā pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.
ud5.4:2.2Addasā kho bhagavā te sambahule kumārake antarā ca sāvatthiṁ antarā ca jetavanaṁ macchake bādhente.
ud5.4:2.3Disvāna yena te kumārakā tenupasaṅkami; upasaṅkamitvā te kumārake etadavoca:
ud5.4:2.4“bhāyatha vo, tumhe kumārakā, dukkhassa, appiyaṁ vo dukkhan”ti?
ud5.4:2.5“Evaṁ, bhante, bhāyāma mayaṁ, bhante, dukkhassa, appiyaṁ no dukkhan”ti.
ud5.4:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud5.4:4.1“Sace bhāyatha dukkhassa,
ud5.4:4.2sace vo dukkhamappiyaṁ;
ud5.4:4.3Mākattha pāpakaṁ kammaṁ,
ud5.4:4.4āvi vā yadi vā raho.
ud5.4:5.1Sace ca pāpakaṁ kammaṁ,
ud5.4:5.2karissatha karotha vā;
ud5.4:5.3Na vo dukkhā pamutyatthi,
ud5.4:5.4upeccapi palāyatan”ti.
ud5.4:5.5Catutthaṁ.