ud5.7:0.1Udāna 5.7
ud5.7:0.2Kaṅkhārevatasutta
ud5.7:1.1Evaṁ me sutaṁ—
ud5.7:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud5.7:1.3Tena kho pana samayena āyasmā kaṅkhārevato bhagavato avidūre nisinno hoti pallaṅkaṁ ābhujitvā ujuṁ kāyaṁ paṇidhāya attano kaṅkhāvitaraṇavisuddhiṁ paccavekkhamāno.
ud5.7:2.1Addasā kho bhagavā āyasmantaṁ kaṅkhārevataṁ avidūre nisinnaṁ pallaṅkaṁ ābhujitvā ujuṁ kāyaṁ paṇidhāya attano kaṅkhāvitaraṇavisuddhiṁ paccavekkhamānaṁ.
ud5.7:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud5.7:4.1“Yā kāci kaṅkhā idha vā huraṁ vā,
ud5.7:4.2Sakavediyā vā paravediyā vā;
ud5.7:4.3Ye jhāyino tā pajahanti sabbā,
ud5.7:4.4Ātāpino brahmacariyaṁ carantā”ti.
ud5.7:4.5Sattamaṁ.