ud5.8:0.1Udāna 5.8
ud5.8:0.2Saṅghabhedasutta
ud5.8:1.1Evaṁ me sutaṁ—
ud5.8:1.2ekaṁ samayaṁ bhagavā rājagahe viharati veḷuvane kalandakanivāpe.
ud5.8:1.3Tena kho pana samayena āyasmā ānando tadahuposathe pubbaṇhasamayaṁ nivāsetvā pattacīvaramādāya rājagahaṁ piṇḍāya pāvisi.
ud5.8:2.1Addasā kho devadatto āyasmantaṁ ānandaṁ rājagahe piṇḍāya carantaṁ.
ud5.8:2.2Disvāna yenāyasmā ānando tenupasaṅkami; upasaṅkamitvā āyasmantaṁ ānandaṁ etadavoca:
ud5.8:2.3“ajjatagge dānāhaṁ, āvuso ānanda, aññatreva bhagavatā aññatra bhikkhusaṅghā uposathaṁ karissāmi saṅghakammāni cā”ti.
ud5.8:3.1Atha kho āyasmā ānando rājagahe piṇḍāya caritvā pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud5.8:3.2Ekamantaṁ nisinno kho āyasmā ānando bhagavantaṁ etadavoca:
ud5.8:4.1“Idhāhaṁ, bhante, pubbaṇhasamayaṁ nivāsetvā pattacīvaramādāya rājagahaṁ piṇḍāya pāvisiṁ.
ud5.8:4.2Addasā kho maṁ, bhante, devadatto rājagahe piṇḍāya carantaṁ.
ud5.8:4.3Disvāna yenāhaṁ tenupasaṅkami; upasaṅkamitvā maṁ etadavoca:
ud5.8:4.4‘ajjatagge dānāhaṁ, āvuso ānanda, aññatreva bhagavatā aññatra bhikkhusaṅghā uposathaṁ karissāmi saṅghakammāni cā’ti.
ud5.8:4.5Ajja, bhante, devadatto saṅghaṁ bhindissati, uposathañca karissati saṅghakammāni cā”ti.
ud5.8:5.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud5.8:6.1“Sukaraṁ sādhunā sādhu,
ud5.8:6.2Sādhu pāpena dukkaraṁ;
ud5.8:6.3Pāpaṁ pāpena sukaraṁ,
ud5.8:6.4Pāpamariyehi dukkaran”ti.
ud5.8:6.5Aṭṭhamaṁ.