ud6.3:0.1Udāna 6.3
ud6.3:0.2Paccavekkhaṇasutta
ud6.3:1.1Evaṁ me sutaṁ—
ud6.3:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud6.3:1.3Tena kho pana samayena bhagavā attano aneke pāpake akusale dhamme pahīne paccavekkhamāno nisinno hoti, aneke ca kusale dhamme bhāvanāpāripūriṁ gate.
ud6.3:2.1Atha kho bhagavā attano aneke pāpake akusale dhamme pahīne viditvā aneke ca kusale dhamme bhāvanāpāripūriṁ gate tāyaṁ velāyaṁ imaṁ udānaṁ udānesi:
ud6.3:3.1“Ahu pubbe tadā nāhu,
ud6.3:3.2nāhu pubbe tadā ahu;
ud6.3:3.3Na cāhu na ca bhavissati,
ud6.3:3.4na cetarahi vijjatī”ti.
ud6.3:3.5Tatiyaṁ.