ud6.4:0.1Udāna 6.4
ud6.4:0.2Paṭhamanānātitthiyasutta
ud6.4:1.1Evaṁ me sutaṁ—
ud6.4:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud6.4:1.3Tena kho pana samayena sambahulā nānātitthiyasamaṇabrāhmaṇaparibbājakā sāvatthiyaṁ paṭivasanti nānādiṭṭhikā nānākhantikā nānārucikā nānādiṭṭhinissayanissitā.
ud6.4:2.1Santeke samaṇabrāhmaṇā evaṁvādino evaṁdiṭṭhino:
ud6.4:2.2“sassato loko, idameva saccaṁ moghamaññan”ti.
ud6.4:3.1Santi paneke samaṇabrāhmaṇā evaṁvādino evaṁdiṭṭhino:
ud6.4:3.2“asassato loko, idameva saccaṁ moghamaññan”ti.
ud6.4:4.1Santeke samaṇabrāhmaṇā evaṁvādino evaṁdiṭṭhino:
ud6.4:4.2“antavā loko, idameva saccaṁ moghamaññan”ti.
ud6.4:5.1Santi paneke samaṇabrāhmaṇā evaṁvādino evaṁdiṭṭhino:
ud6.4:5.2“anantavā loko, idameva saccaṁ moghamaññan”ti.
ud6.4:6.1Santeke samaṇabrāhmaṇā evaṁvādino evaṁdiṭṭhino:
ud6.4:6.2“taṁ jīvaṁ taṁ sarīraṁ, idameva saccaṁ moghamaññan”ti.
ud6.4:7.1Santi paneke samaṇabrāhmaṇā evaṁvādino evaṁdiṭṭhino:
ud6.4:7.2“aññaṁ jīvaṁ aññaṁ sarīraṁ, idameva saccaṁ moghamaññan”ti.
ud6.4:8.1Santeke samaṇabrāhmaṇā evaṁvādino evaṁdiṭṭhino:
ud6.4:8.2“hoti tathāgato paraṁ maraṇā, idameva saccaṁ moghamaññan”ti.
ud6.4:9.1Santi paneke samaṇabrāhmaṇā evaṁvādino evaṁdiṭṭhino:
ud6.4:9.2“na hoti tathāgato paraṁ maraṇā, idameva saccaṁ moghamaññan”ti.
ud6.4:10.1Santeke samaṇabrāhmaṇā evaṁvādino evaṁdiṭṭhino:
ud6.4:10.2“hoti ca na ca hoti tathāgato paraṁ maraṇā, idameva saccaṁ moghamaññan”ti.
ud6.4:11.1Santi paneke samaṇabrāhmaṇā evaṁvādino evaṁdiṭṭhino:
ud6.4:11.2“neva hoti na na hoti tathāgato paraṁ maraṇā, idameva saccaṁ moghamaññan”ti.
ud6.4:12.1Te bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:
ud6.4:12.2“ediso dhammo, nediso dhammo;
ud6.4:12.3nediso dhammo, ediso dhammo”ti.
ud6.4:13.1Atha kho sambahulā bhikkhū pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisiṁsu.
ud6.4:13.2Sāvatthiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
ud6.4:13.3Ekamantaṁ nisinnā kho te bhikkhū bhagavantaṁ etadavocuṁ:
ud6.4:14.1“Idha, bhante, sambahulā nānātitthiyasamaṇabrāhmaṇaparibbājakā sāvatthiyaṁ paṭivasanti nānādiṭṭhikā nānākhantikā nānārucikā nānādiṭṭhinissayanissitā—
ud6.4:15.1Santeke samaṇabrāhmaṇā evaṁvādino evaṁdiṭṭhino:
ud6.4:15.2‘sassato loko, idameva saccaṁ moghamaññan’ti …pe…
ud6.4:15.3te bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:
ud6.4:15.4‘ediso dhammo, nediso dhammo;
ud6.4:15.5nediso dhammo, ediso dhammo’”ti.
ud6.4:16.1“Aññatitthiyā, bhikkhave, paribbājakā andhā acakkhukā;
ud6.4:16.2atthaṁ na jānanti, anatthaṁ na jānanti, dhammaṁ na jānanti, adhammaṁ na jānanti.
ud6.4:16.3Te atthaṁ ajānantā anatthaṁ ajānantā dhammaṁ ajānantā adhammaṁ ajānantā bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:
ud6.4:16.4‘ediso dhammo, nediso dhammo;
ud6.4:16.5nediso dhammo, ediso dhammo’ti.
ud6.4:17.1Bhūtapubbaṁ, bhikkhave, imissāyeva sāvatthiyā aññataro rājā ahosi.
ud6.4:17.2Atha kho, bhikkhave, so rājā aññataraṁ purisaṁ āmantesi:
ud6.4:17.3‘ehi tvaṁ, ambho purisa, yāvatakā sāvatthiyā jaccandhā te sabbe ekajjhaṁ sannipātehī’ti.
ud6.4:17.4‘Evaṁ, devā’ti kho, bhikkhave, so puriso tassa rañño paṭissutvā yāvatakā sāvatthiyā jaccandhā te sabbe gahetvā yena so rājā tenupasaṅkami; upasaṅkamitvā taṁ rājānaṁ etadavoca:
ud6.4:17.5‘sannipātitā kho te, deva, yāvatakā sāvatthiyā jaccandhā’ti.
ud6.4:17.6‘Tena hi, bhaṇe, jaccandhānaṁ hatthiṁ dassehī’ti.
ud6.4:17.7‘Evaṁ, devā’ti kho, bhikkhave, so puriso tassa rañño paṭissutvā jaccandhānaṁ hatthiṁ dassesi—
ud6.4:18.1Ekaccānaṁ jaccandhānaṁ hatthissa sīsaṁ dassesi:
ud6.4:18.2‘ediso, jaccandhā, hatthī’ti.
ud6.4:18.3Ekaccānaṁ jaccandhānaṁ hatthissa kaṇṇaṁ dassesi:
ud6.4:18.4‘ediso, jaccandhā, hatthī’ti.
ud6.4:18.5Ekaccānaṁ jaccandhānaṁ hatthissa dantaṁ dassesi:
ud6.4:18.6‘ediso, jaccandhā, hatthī’ti.
ud6.4:18.7Ekaccānaṁ jaccandhānaṁ hatthissa soṇḍaṁ dassesi:
ud6.4:18.8‘ediso, jaccandhā, hatthī’ti.
ud6.4:18.9Ekaccānaṁ jaccandhānaṁ hatthissa kāyaṁ dassesi:
ud6.4:18.10‘ediso, jaccandhā, hatthī’ti.
ud6.4:18.11Ekaccānaṁ jaccandhānaṁ hatthissa pādaṁ dassesi:
ud6.4:18.12‘ediso, jaccandhā, hatthī’ti.
ud6.4:18.13Ekaccānaṁ jaccandhānaṁ hatthissa satthiṁ dassesi:
ud6.4:18.14‘ediso, jaccandhā, hatthī’ti.
ud6.4:18.15Ekaccānaṁ jaccandhānaṁ hatthissa naṅguṭṭhaṁ dassesi:
ud6.4:18.16‘ediso, jaccandhā, hatthī’ti.
ud6.4:18.17Ekaccānaṁ jaccandhānaṁ hatthissa vāladhiṁ dassesi:
ud6.4:18.18‘ediso, jaccandhā, hatthī’ti.
ud6.4:19.1Atha kho, bhikkhave, so puriso jaccandhānaṁ hatthiṁ dassetvā yena so rājā tenupasaṅkami; upasaṅkamitvā taṁ rājānaṁ etadavoca:
ud6.4:19.2‘diṭṭho kho tehi, deva, jaccandhehi hatthī;
ud6.4:19.3yassadāni kālaṁ maññasī’ti.
ud6.4:20.1Atha kho, bhikkhave, so rājā yena te jaccandhā tenupasaṅkami; upasaṅkamitvā te jaccandhe etadavoca:
ud6.4:20.2‘diṭṭho vo, jaccandhā, hatthī’ti?
ud6.4:20.3‘Evaṁ, deva, diṭṭho no hatthī’ti.
ud6.4:20.4‘Vadetha, jaccandhā, kīdiso hatthī’ti?
ud6.4:21.1Yehi, bhikkhave, jaccandhehi hatthissa sīsaṁ diṭṭhaṁ ahosi, te evamāhaṁsu:
ud6.4:21.2‘ediso, deva, hatthī seyyathāpi kumbho’ti.
ud6.4:22.1Yehi, bhikkhave, jaccandhehi hatthissa kaṇṇo diṭṭho ahosi, te evamāhaṁsu:
ud6.4:22.2‘ediso, deva, hatthī seyyathāpi suppo’ti.
ud6.4:23.1Yehi, bhikkhave, jaccandhehi hatthissa danto diṭṭho ahosi, te evamāhaṁsu:
ud6.4:23.2‘ediso, deva, hatthī seyyathāpi khīlo’ti.
ud6.4:24.1Yehi, bhikkhave, jaccandhehi hatthissa soṇḍo diṭṭho ahosi, te evamāhaṁsu:
ud6.4:24.2‘ediso, deva, hatthī seyyathāpi naṅgalīsā’ti.
ud6.4:25.1Yehi, bhikkhave, jaccandhehi hatthissa kāyo diṭṭho ahosi, te evamāhaṁsu:
ud6.4:25.2‘ediso, deva, hatthī seyyathāpi koṭṭho’ti.
ud6.4:26.1Yehi, bhikkhave, jaccandhehi hatthissa pādo diṭṭho ahosi, te evamāhaṁsu:
ud6.4:26.2‘ediso, deva, hatthī seyyathāpi thūṇo’ti.
ud6.4:27.1Yehi, bhikkhave, jaccandhehi hatthissa satthi diṭṭho ahosi, te evamāhaṁsu:
ud6.4:27.2‘ediso, deva, hatthī seyyathāpi udukkhalo’ti.
ud6.4:28.1Yehi, bhikkhave, jaccandhehi hatthissa naṅguṭṭhaṁ diṭṭhaṁ ahosi, te evamāhaṁsu:
ud6.4:28.2‘ediso, deva, hatthī seyyathāpi musalo’ti.
ud6.4:29.1Yehi, bhikkhave, jaccandhehi hatthissa vāladhi diṭṭho ahosi, te evamāhaṁsu:
ud6.4:29.2‘ediso, deva, hatthī seyyathāpi sammajjanī’ti.
ud6.4:30.1Te ‘ediso hatthī, nediso hatthī;
ud6.4:30.2nediso hatthī, ediso hatthī’ti aññamaññaṁ muṭṭhīhi saṁsumbhiṁsu.
ud6.4:30.3Tena ca pana, bhikkhave, so rājā attamano ahosi.
ud6.4:31.1Evamevaṁ kho, bhikkhave, aññatitthiyā paribbājakā andhā acakkhukā.
ud6.4:31.2Te atthaṁ na jānanti anatthaṁ na jānanti, dhammaṁ na jānanti adhammaṁ na jānanti.
ud6.4:31.3Te atthaṁ ajānantā anatthaṁ ajānantā, dhammaṁ ajānantā adhammaṁ ajānantā bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:
ud6.4:31.4‘ediso dhammo, nediso dhammo;
ud6.4:31.5nediso dhammo, ediso dhammo’”ti.
ud6.4:32.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud6.4:33.1“Imesu kira sajjanti,
ud6.4:33.2eke samaṇabrāhmaṇā;
ud6.4:33.3Viggayha naṁ vivadanti,
ud6.4:33.4janā ekaṅgadassino”ti.
ud6.4:33.5Catutthaṁ.