ud6.6:0.1Udāna 6.6
ud6.6:0.2Tatiyanānātitthiyasutta
ud6.6:1.1Evaṁ me sutaṁ—
ud6.6:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud6.6:1.3Tena kho pana samayena sambahulā nānātitthiyasamaṇabrāhmaṇaparibbājakā sāvatthiyaṁ paṭivasanti nānādiṭṭhikā nānākhantikā nānārucikā nānādiṭṭhinissayanissitā.
ud6.6:2.1Santeke samaṇabrāhmaṇā evaṁvādino evaṁdiṭṭhino:
ud6.6:2.2“sassato attā ca loko ca, idameva saccaṁ moghamaññan”ti.
ud6.6:3.1Santi paneke samaṇabrāhmaṇā evaṁvādino evaṁdiṭṭhino:
ud6.6:3.2“asassato attā ca loko ca, idameva saccaṁ moghamaññan”ti.
ud6.6:4.1Santeke samaṇabrāhmaṇā evaṁvādino evaṁdiṭṭhino:
ud6.6:4.2“sassato ca asassato ca attā ca loko ca, idameva saccaṁ moghamaññan”ti.
ud6.6:5.1Santi paneke samaṇabrāhmaṇā evaṁvādino evaṁdiṭṭhino:
ud6.6:5.2“neva sassato nāsassato attā ca loko ca, idameva saccaṁ moghamaññan”ti.
ud6.6:6.1Santeke samaṇabrāhmaṇā evaṁvādino evaṁdiṭṭhino:
ud6.6:6.2“sayaṅkato attā ca loko ca, idameva saccaṁ moghamaññan”ti.
ud6.6:7.1Santi paneke samaṇabrāhmaṇā evaṁvādino evaṁdiṭṭhino:
ud6.6:7.2“paraṅkato attā ca loko ca, idameva saccaṁ moghamaññan”ti.
ud6.6:8.1Santeke samaṇabrāhmaṇā evaṁvādino evaṁdiṭṭhino:
ud6.6:8.2“sayaṅkato ca paraṅkato ca attā ca loko ca, idameva saccaṁ moghamaññan”ti.
ud6.6:9.1Santi paneke samaṇabrāhmaṇā evaṁvādino evaṁdiṭṭhino:
ud6.6:9.2“asayaṅkāro aparaṅkāro adhiccasamuppanno attā ca loko ca, idameva saccaṁ moghamaññan”ti.
ud6.6:10.1Santeke samaṇabrāhmaṇā evaṁvādino evaṁdiṭṭhino:
ud6.6:10.2“sassataṁ sukhadukkhaṁ attā ca loko ca, idameva saccaṁ moghamaññan”ti.
ud6.6:11.1Santi paneke samaṇabrāhmaṇā evaṁvādino evaṁdiṭṭhino:
ud6.6:11.2“asassataṁ sukhadukkhaṁ attā ca loko ca, idameva saccaṁ moghamaññan”ti.
ud6.6:12.1Santeke samaṇabrāhmaṇā evaṁvādino evaṁdiṭṭhino:
ud6.6:12.2“sassatañca asassatañca sukhadukkhaṁ attā ca loko ca, idameva saccaṁ moghamaññan”ti.
ud6.6:13.1Santi paneke samaṇabrāhmaṇā evaṁvādino evaṁdiṭṭhino:
ud6.6:13.2“neva sassataṁ nāsassataṁ sukhadukkhaṁ attā ca loko ca, idameva saccaṁ moghamaññan”ti.
ud6.6:14.1Santeke samaṇabrāhmaṇā evaṁvādino evaṁdiṭṭhino:
ud6.6:14.2“sayaṅkataṁ sukhadukkhaṁ attā ca loko ca, idameva saccaṁ moghamaññan”ti.
ud6.6:15.1Santi paneke samaṇabrāhmaṇā evaṁvādino evaṁdiṭṭhino:
ud6.6:15.2“paraṅkataṁ sukhadukkhaṁ attā ca loko ca, idameva saccaṁ moghamaññan”ti.
ud6.6:16.1Santeke samaṇabrāhmaṇā evaṁvādino evaṁdiṭṭhino:
ud6.6:16.2“sayaṅkatañca paraṅkatañca sukhadukkhaṁ attā ca loko ca, idameva saccaṁ moghamaññan”ti.
ud6.6:17.1Santi paneke samaṇabrāhmaṇā evaṁvādino evaṁdiṭṭhino:
ud6.6:17.2“asayaṅkāraṁ aparaṅkāraṁ adhiccasamuppannaṁ sukhadukkhaṁ attā ca loko ca, idameva saccaṁ moghamaññan”ti.
ud6.6:18.1Te bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:
ud6.6:18.2“ediso dhammo, nediso dhammo;
ud6.6:18.3nediso dhammo, ediso dhammo”ti.
ud6.6:19.1Atha kho sambahulā bhikkhū pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisiṁsu.
ud6.6:19.2Sāvatthiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
ud6.6:19.3Ekamantaṁ nisinnā kho te bhikkhū bhagavantaṁ etadavocuṁ:
ud6.6:20.1“Idha, bhante, sambahulā nānātitthiyasamaṇabrāhmaṇaparibbājakā sāvatthiyaṁ paṭivasanti nānādiṭṭhikā nānākhantikā nānārucikā nānādiṭṭhinissayanissitā.
ud6.6:21.1Santeke samaṇabrāhmaṇā evaṁvādino evaṁdiṭṭhino:
ud6.6:21.2‘sassato attā ca loko ca, idameva saccaṁ moghamaññan’ti …pe…
ud6.6:21.3te bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:
ud6.6:21.4‘ediso dhammo, nediso dhammo;
ud6.6:21.5nediso dhammo, ediso dhammo’”ti.
ud6.6:22.1“Aññatitthiyā, bhikkhave, paribbājakā andhā acakkhukā.
ud6.6:22.2Te atthaṁ na jānanti anatthaṁ na jānanti, dhammaṁ na jānanti adhammaṁ na jānanti.
ud6.6:22.3Te atthaṁ ajānantā anatthaṁ ajānantā, dhammaṁ ajānantā adhammaṁ ajānantā bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:
ud6.6:22.4‘ediso dhammo, nediso dhammo;
ud6.6:22.5nediso dhammo, ediso dhammo’”ti.
ud6.6:23.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud6.6:24.1“Ahaṅkārapasutāyaṁ pajā,
ud6.6:24.2Paraṅkārūpasaṁhitā;
ud6.6:24.3Etadeke nābbhaññaṁsu,
ud6.6:24.4Na naṁ sallanti addasuṁ.
ud6.6:25.1Etañca sallaṁ paṭikacca passato,
ud6.6:25.2Ahaṁ karomīti na tassa hoti;
ud6.6:25.3Paro karotīti na tassa hoti.
ud6.6:26.1Mānupetā ayaṁ pajā,
ud6.6:26.2Mānaganthā mānavinibaddhā;
ud6.6:26.3Diṭṭhīsu sārambhakathā,
ud6.6:26.4Saṁsāraṁ nātivattatī”ti.
ud6.6:26.5Chaṭṭhaṁ.