ud7.10:0.1Udāna 7.10
ud7.10:0.2Utenasutta
ud7.10:1.1Evaṁ me sutaṁ—
ud7.10:1.2ekaṁ samayaṁ bhagavā kosambiyaṁ viharati ghositārāme.
ud7.10:1.3Tena kho pana samayena rañño utenassa uyyānagatassa antepuraṁ daḍḍhaṁ hoti, pañca ca itthisatāni kālaṅkatāni honti sāmāvatīpamukhāni.
ud7.10:2.1Atha kho sambahulā bhikkhū pubbaṇhasamayaṁ nivāsetvā pattacīvaramādāya kosambiṁ piṇḍāya pāvisiṁsu.
ud7.10:2.2Kosambiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
ud7.10:2.3Ekamantaṁ nisinnā kho te bhikkhū bhagavantaṁ etadavocuṁ:
ud7.10:2.4“idha, bhante, rañño utenassa uyyānagatassa antepuraṁ daḍḍhaṁ, pañca ca itthisatāni kālaṅkatāni sāmāvatīpamukhāni.
ud7.10:2.5Tāsaṁ, bhante, upāsikānaṁ kā gati ko abhisamparāyo”ti?
ud7.10:3.1“Santettha, bhikkhave, upāsikāyo sotāpannā, santi sakadāgāminiyo, santi anāgāminiyo.
ud7.10:3.2Sabbā tā, bhikkhave, upāsikāyo anipphalā kālaṅkatā”ti.
ud7.10:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.10:5.1“Mohasambandhano loko,
ud7.10:5.2bhabbarūpova dissati;
ud7.10:5.3Upadhibandhano bālo,
ud7.10:5.4tamasā parivārito;
ud7.10:5.5Sassatoriva khāyati,
ud7.10:5.6passato natthi kiñcanan”ti.
ud7.10:5.7Dasamaṁ.
ud7.10:6.0Tassuddānaṁ
ud7.10:6.1Dve bhaddiyā dve ca sattā,
ud7.10:6.2lakuṇḍako taṇhākkhayo;
ud7.10:6.3Papañcakhayo ca kaccāno,
ud7.10:6.4udapānañca utenoti.
ud7.10:6.5Cūḷavaggo sattamo.