ud8.1:0.1Udāna 8.1
ud8.1:0.2Paṭhamanibbānapaṭisaṁyuttasutta
ud8.1:1.1Evaṁ me sutaṁ—
ud8.1:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud8.1:1.3Tena kho pana samayena bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti.
ud8.1:1.4Tedha bhikkhū aṭṭhiṁ katvā manasi katvā sabbaṁ cetaso samannāharitvā ohitasotā dhammaṁ suṇanti.
ud8.1:2.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud8.1:3.1“Atthi, bhikkhave, tadāyatanaṁ, yattha neva pathavī, na āpo, na tejo, na vāyo, na ākāsānañcāyatanaṁ, na viññāṇañcāyatanaṁ, na ākiñcaññāyatanaṁ, na nevasaññānāsaññāyatanaṁ, nāyaṁ loko, na paraloko, na ubho candimasūriyā.
ud8.1:3.2Tatrāpāhaṁ, bhikkhave, neva āgatiṁ vadāmi, na gatiṁ, na ṭhitiṁ, na cutiṁ, na upapattiṁ;
ud8.1:3.3appatiṭṭhaṁ, appavattaṁ, anārammaṇamevetaṁ.
ud8.1:3.4Esevanto dukkhassā”ti.
ud8.1:3.5Paṭhamaṁ.