ud8.2:0.1Udāna 8.2
ud8.2:0.2Dutiyanibbānapaṭisaṁyuttasutta
ud8.2:1.1Evaṁ me sutaṁ—
ud8.2:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud8.2:1.3Tena kho pana samayena bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti.
ud8.2:1.4Tedha bhikkhū aṭṭhiṁ katvā manasi katvā sabbaṁ cetaso samannāharitvā ohitasotā dhammaṁ suṇanti.
ud8.2:2.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud8.2:3.1“Duddasaṁ anataṁ nāma,
ud8.2:3.2na hi saccaṁ sudassanaṁ;
ud8.2:3.3Paṭividdhā taṇhā jānato,
ud8.2:3.4passato natthi kiñcanan”ti.
ud8.2:3.5Dutiyaṁ.