ud7.8:0.1Udāna 7.8
ud7.8:0.2Kaccānasutta
ud7.8:1.1Evaṁ me sutaṁ—
ud7.8:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud7.8:1.3Tena kho pana samayena āyasmā mahākaccāno bhagavato avidūre nisinno hoti pallaṅkaṁ ābhujitvā ujuṁ kāyaṁ paṇidhāya kāyagatāya satiyā ajjhattaṁ parimukhaṁ sūpaṭṭhitāya.
ud7.8:2.1Addasā kho bhagavā āyasmantaṁ mahākaccānaṁ avidūre nisinnaṁ pallaṅkaṁ ābhujitvā ujuṁ kāyaṁ paṇidhāya kāyagatāya satiyā ajjhattaṁ parimukhaṁ sūpaṭṭhitāya.
ud7.8:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.8:4.1“Yassa siyā sabbadā sati,
ud7.8:4.2Satataṁ kāyagatā upaṭṭhitā;
ud7.8:4.3No cassa no ca me siyā,
ud7.8:4.4Na bhavissati na ca me bhavissati;
ud7.8:4.5Anupubbavihāri tattha so,
ud7.8:4.6Kāleneva tare visattikan”ti.
ud7.8:4.7Aṭṭhamaṁ.