ud7.7:0.1Udāna 7.7
ud7.7:0.2Papañcakhayasutta
ud7.7:1.1Evaṁ me sutaṁ—
ud7.7:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud7.7:1.3Tena kho pana samayena bhagavā attano papañcasaññāsaṅkhāpahānaṁ paccavekkhamāno nisinno hoti.
ud7.7:2.1Atha kho bhagavā attano papañcasaññāsaṅkhāpahānaṁ viditvā tāyaṁ velāyaṁ imaṁ udānaṁ udānesi:
ud7.7:3.1“Yassa papañcā ṭhiti ca natthi,
ud7.7:3.2Sandānaṁ palighañca vītivatto;
ud7.7:3.3Taṁ nittaṇhaṁ muniṁ carantaṁ,
ud7.7:3.4Nāvajānāti sadevakopi loko”ti.
ud7.7:3.5Sattamaṁ.