ud7.6:0.1Udāna 7.6
ud7.6:0.2Taṇhāsaṅkhayasutta
ud7.6:1.1Evaṁ me sutaṁ—
ud7.6:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud7.6:1.3Tena kho pana samayena āyasmā aññāsikoṇḍañño bhagavato avidūre nisinno hoti pallaṅkaṁ ābhujitvā ujuṁ kāyaṁ paṇidhāya taṇhāsaṅkhayavimuttiṁ paccavekkhamāno.
ud7.6:2.1Addasā kho bhagavā āyasmantaṁ aññāsikoṇḍaññaṁ avidūre nisinnaṁ pallaṅkaṁ ābhujitvā ujuṁ kāyaṁ paṇidhāya taṇhāsaṅkhayavimuttiṁ paccavekkhamānaṁ.
ud7.6:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.6:4.1“Yassa mūlaṁ chamā natthi,
ud7.6:4.2paṇṇā natthi kuto latā;
ud7.6:4.3Taṁ dhīraṁ bandhanā muttaṁ,
ud7.6:4.4ko taṁ ninditumarahati;
ud7.6:4.5Devāpi naṁ pasaṁsanti,
ud7.6:4.6brahmunāpi pasaṁsito”ti.
ud7.6:4.7Chaṭṭhaṁ.