ud7.5:0.1Udāna 7.5
ud7.5:0.2Aparalakuṇḍakabhaddiyasutta
ud7.5:1.1Evaṁ me sutaṁ—
ud7.5:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud7.5:1.3Tena kho pana samayena āyasmā lakuṇḍakabhaddiyo sambahulānaṁ bhikkhūnaṁ piṭṭhito piṭṭhito yena bhagavā tenupasaṅkami.
ud7.5:2.1Addasā kho bhagavā āyasmantaṁ lakuṇḍakabhaddiyaṁ dūratova sambahulānaṁ bhikkhūnaṁ piṭṭhito piṭṭhito āgacchantaṁ dubbaṇṇaṁ duddasikaṁ okoṭimakaṁ yebhuyyena bhikkhūnaṁ paribhūtarūpaṁ.
ud7.5:2.2Disvāna bhikkhū āmantesi:
ud7.5:3.1“Passatha no tumhe, bhikkhave, etaṁ bhikkhuṁ dūratova sambahulānaṁ bhikkhūnaṁ piṭṭhito piṭṭhito āgacchantaṁ dubbaṇṇaṁ duddasikaṁ okoṭimakaṁ yebhuyyena bhikkhūnaṁ paribhūtarūpan”ti?
ud7.5:3.2“Evaṁ, bhante”ti.
ud7.5:4.1“Eso, bhikkhave, bhikkhu mahiddhiko mahānubhāvo. Na ca sā samāpatti sulabharūpā yā tena bhikkhunā asamāpannapubbā.
ud7.5:4.2Yassa catthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja viharatī”ti.
ud7.5:5.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.5:6.1“Nelaṅgo setapacchādo,
ud7.5:6.2ekāro vattatī ratho;
ud7.5:6.3Anīghaṁ passa āyantaṁ,
ud7.5:6.4chinnasotaṁ abandhanan”ti.
ud7.5:6.5Pañcamaṁ.