ud7.4:0.1Udāna 7.4
ud7.4:0.2Dutiyasattasutta
ud7.4:1.1Evaṁ me sutaṁ—
ud7.4:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud7.4:1.3Tena kho pana samayena sāvatthiyā manussā yebhuyyena kāmesu sattā (…) rattā giddhā gathitā mucchitā ajjhosannā andhīkatā sammattakajātā kāmesu viharanti.
ud7.4:2.1Atha kho bhagavā pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.
ud7.4:2.2Addasā kho bhagavā sāvatthiyā te manusse yebhuyyena kāmesu satte ratte giddhe gathite mucchite ajjhopanne andhīkate sammattakajāte kāmesu viharante.
ud7.4:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.4:4.1“Kāmandhā jālasañchannā,
ud7.4:4.2Taṇhāchadanachāditā;
ud7.4:4.3Pamattabandhunā baddhā,
ud7.4:4.4Macchāva kumināmukhe;
ud7.4:4.5Jarāmaraṇamanventi,
ud7.4:4.6Vaccho khīrapakova mātaran”ti.
ud7.4:4.7Catutthaṁ.