ud7.3:0.1Udāna 7.3
ud7.3:0.2Paṭhamasattasutta
ud7.3:1.1Evaṁ me sutaṁ—
ud7.3:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud7.3:1.3Tena kho pana samayena sāvatthiyā manussā yebhuyyena kāmesu ativelaṁ sattā (…) rattā giddhā gathitā mucchitā ajjhosannā sammattakajātā kāmesu viharanti.
ud7.3:2.1Atha kho sambahulā bhikkhū pubbaṇhasamayaṁ nivāsetvā pattacīvaramādāya sāvatthiyaṁ piṇḍāya pāvisiṁsu.
ud7.3:2.2Sāvatthiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
ud7.3:2.3Ekamantaṁ nisinnā kho te bhikkhū bhagavantaṁ etadavocuṁ:
ud7.3:2.4“idha, bhante, sāvatthiyā manussā yebhuyyena kāmesu ativelaṁ sattā rattā giddhā gathitā mucchitā ajjhosannā sammattakajātā kāmesu viharantī”ti.
ud7.3:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.3:4.1“Kāmesu sattā kāmasaṅgasattā,
ud7.3:4.2Saṁyojane vajjamapassamānā;
ud7.3:4.3Na hi jātu saṁyojanasaṅgasattā,
ud7.3:4.4Oghaṁ tareyyuṁ vipulaṁ mahantan”ti.
ud7.3:4.5Tatiyaṁ.