ud8.10:0.1Udāna 8.10
ud8.10:0.2Dutiyadabbasutta
ud8.10:1.1Evaṁ me sutaṁ—
ud8.10:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud8.10:1.3Tatra kho bhagavā bhikkhū āmantesi:
ud8.10:1.4“bhikkhavo”ti.
ud8.10:1.5“Bhadante”ti te bhikkhū bhagavato paccassosuṁ.
ud8.10:1.6Bhagavā etadavoca:
ud8.10:2.1“Dabbassa, bhikkhave, mallaputtassa vehāsaṁ abbhuggantvā ākāse antalikkhe pallaṅkena nisīditvā tejodhātuṁ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masi.
ud8.10:2.2Seyyathāpi nāma sappissa vā telassa vā jhāyamānassa ḍayhamānassa neva chārikā paññāyati na masi;
ud8.10:2.3evamevaṁ kho, bhikkhave, dabbassa mallaputtassa vehāsaṁ abbhuggantvā ākāse antalikkhe pallaṅkena nisīditvā tejodhātuṁ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masī”ti.
ud8.10:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud8.10:4.1“Ayoghanahatasseva,
ud8.10:4.2jalato jātavedaso;
ud8.10:4.3Anupubbūpasantassa,
ud8.10:4.4yathā na ñāyate gati.
ud8.10:5.1Evaṁ sammāvimuttānaṁ,
ud8.10:5.2kāmabandhoghatārinaṁ;
ud8.10:5.3Paññāpetuṁ gati natthi,
ud8.10:5.4pattānaṁ acalaṁ sukhan”ti.
ud8.10:5.5Dasamaṁ.
ud8.10:5.6Pāṭaligāmiyavaggo aṭṭhamo.
ud8.10:6.0Tassuddānaṁ
ud8.10:6.1Nibbānā caturo vuttā,
ud8.10:6.2cundo pāṭaligāmiyā;
ud8.10:6.3Dvidhāpatho visākhā ca,
ud8.10:6.4dabbena saha te dasāti.
ud8.10:7.0Udāne vaggānamuddānaṁ
ud8.10:7.1Vaggamidaṁ paṭhamaṁ varabodhi,
ud8.10:7.2Vaggamidaṁ dutiyaṁ mucalindo;
ud8.10:7.3Nandakavaggavaro tatiyo tu,
ud8.10:7.4Meghiyavaggavaro ca catuttho.
ud8.10:8.1Pañcamavaggavarantidha soṇo,
ud8.10:8.2Chaṭṭhamavaggavaranti jaccandho;
ud8.10:8.3Sattamavaggavaranti ca cūḷo,
ud8.10:8.4Pāṭaligāmiyamaṭṭhamavaggo.
ud8.10:9.1Asītimanūnakasuttavaraṁ,
ud8.10:9.2Vaggamidaṭṭhakaṁ suvibhattaṁ;
ud8.10:9.3Dassitaṁ cakkhumatā vimalena,
ud8.10:9.4Addhā hi taṁ udānamitīdamāhu.
ud8.10:9.5Udānapāḷi niṭṭhitā.